Purtau uestg Grab alla fossa

Da Giusep Capaul

Ella catedrala da Cuera, la baselgia digl uestg cun la catedra (sedia), ha in grond pievel assistiu gliendisdis al requiem pontifical pil defunct msgr. Amédée Grab ed alla sepultura sil santeri dils uestgs avon l’entrada dalla catedrala. Ins ha priu cumiau – en tuts quater lungatgs svizzers, cul requiem choral latin e canzuns dil Chor dalla catedrala – dil zun stimau e conciliant cau diocesan – staus nov onns alla testa digl uestgiu da Cuera, al qual el veva purtau pasch, ruaus e reconciliaziun.

All’entschatta dil funeral ei vegniu prelegiu ina condolientscha da papa Francestg per la mort d’uestg Grab che seigi staus in bien cau diocesan e plein carezia. Celebrant principal ei il niev administratur apostolic dalla diocesa da Cuera, uestg Peter Bürcher, staus. El vessi maina sminau da star in di alla testa dalla diocesa da Cuera e da stuer satrar gia in’jamna suenter esser en uffeci uestg Grab, staus ensemen cun el uestg auxiliar dalla diocesa da Genevra, Losanna e Friburg e pli tard siu uestg diocesan. Msgr. uestg Bürcher ei vegnius assistius da 100 spirituals e canonis e da 15 uestgs ed avats, denteren era dil president dalla Conferenza episcopala svizra, msgr. Felix Gmür, e digl arzuestg emeritau Jean-Claude Périsset, in Friburghes, staus pli baul nunzi papal era en Tiaratudestga.

Beneventar ha uestg Bürcher era saviu representants da cantuns diocesans: Grischun (cun il president dalla regenza Jon Domenic Parolini, e cuss. guv. Marcus Caduff) ed ils delegai da Glaruna, Turitg, Sviz sco era dil cussegl dil marcau da Cuera cun president Urs Marti. Cun lur bandieras eran delegaziuns dallas uniuns da Lourdes da Cuera e dalla Surselva sco era dalla secziun gimnasiala Corvina (Nossadunnaun) e dalla corporaziun academica Neu-Romania (Friburg) presentas, dallas qualas uestg Grab era commember. Escortadas ein ellas vegnidas da gardists svizzers en uniforma. Presents eran commembers digl Uorden dils Maltesers ch’ein segidai tier l’organisaziun.

El riug ha igl administratur apostolic, msgr. Peter Bürcher, constatau ch’uestg Grab hagi giu dad ir savens lunsch – restond in bien benedictin – sin diversas vias nunperscrutablas e tras numerusas staziuns naven dalla claustra da Nossadunnaun e sia scola, ad uestg, president dalla Conferenza episcopala dalla Svizra e dall’Europa. Sia mort anetga en in mument special per la diocesa da Cuera dueigi gidar da discuvierer igl essenzial da Jesus Cristus. Concludiu ha il predicatur cun engraziar agl anteriur cau diocesan, msgr. Amédée Grab, per siu survetsch nunstunclenteivel e la perdetga dada cun star a disposiziun sin sias vias.

Suenter la sepultura han commembers dalla Societad da students svizzers – surtut da quellas ch’igl uestg defunct fageva part u era filister d’honur – salvau il tradiziunal commers trest en la Tschalaria vischina. Cun in omagi agl uestg defunct, tras Walter Müller, anteriur plidader dalla Conferenza episcopala, ei il cau diocesan defunct vegnius undraus e sin quei ei vegniu priu cumiau cul ritus studentic usitau.

La sepultura d’uestg Grab ei stada impressiunonta e schau percorscher aunc ina gada tgei stema ed appreziaziun che quei cau diocesan conciliont, che tschercava surtut cuminonza e cumpignia e sesenteva leu bein, gudeva e resta aschia en buna e pia memoria.

Igl uestg emeritau, msgr. Amédée Grab, ei vegnius satraus gest 25 onns suenter uestg Johannes Vonderach, ils dus caus diocesans da Cuera, derivonts ord la Svizra interna – in da Sviz e l’auter d’Uri. RIP