Rumantsch ad Ilanz/Glion

(rtr) Ils Rumantschs da la vischnanca Ilanz/Glion èn persvas ch’il linguatg rumantsch ha profità da la fusiun d’avant tschintg onns. La raschun saja la lescha da linguatgs. Suenter la fusiun da Glion – cura che 13 vischnancas èn daventadas bilinguas – è bain inqual sa dumandà sch’il rumantsch pateschia da quella nova situaziun. La Lia Rumantscha ch’è sa chasada a Glion ha il glindesdi fatg visita en tschintg fracziuns rumantschas dad Ilanz/Glion. La citad da Glion è daventada pli rumantscha, il linguatg è revitalisà e pli visibel ch’avant la fusiun. A Rueun ha RTR accumpagnà la Lia sin via cun il charret da café e cun plunas da discurs. L’administraziun dad Ilanz/Glion ha survegnì bunas notas a Rueun. Uschia ha ina dunna manegià ch’ella possia discurrer rumantsch sin chanzlia a Glion e quai saja d’avantatg per ils da Glion sezs ch’avevan avant la fusiun ina chanzlia tudestga. Il rumantsch ha profità da la fusiun pervi da la lescha da linguatgs da la nova vischnanca. La radiaziun dal rumantsch è uschia pli gronda.