Sentupada Lumnezia – Cadi

(anr/abc) La fin d’jamna vargada han ils dus chors mischedai Vignogn e cecilian Trun dau concert. Igl ei stau ina sentupada dallas colurs dil tun. Ei seigi donn ch’ins hagi buca priu si quei concert, ei havessi valiu da far ina registraziun auditiva. Quei ha ina dunna da lungatg tudestg manegiau suenter il concert dil venderdis sera a Trun. Ell’ei stada incantada dallas producziuns d’omisdus chors. Il Chor mischedau Vignogn ed il Chor cecilian Trun ein sepresentai la fin d’jamna, Igl emprem concert ei staus venderdis ella baselgia da s. Martin a Trun, il secund la dumengia ella baselgia da Pleif a Vella.

Agogic e harmonic

Parts dil concert ha RTR tuttavia registrau, e quei in’jamna avon a Sedrun. Leu ein omisdus chors separticipai alla Fiasta ceciliana da cant. El concert communabel ha igl auditori giu caschun da tedlar danovamein las canzuns da pag ch’ils dus chors havevan cantau a Sedrun. Il Chor cecilian Trun ha cantau cul dirigent Gion Gieri Tuor la canzun «Salidada seis ti, o Regina» da Carli Scherrer. In’ovra ch’ins auda adina bugen. Gest ussa, il matg, eis ella adattada pil cant sacral. La franzosa «Les Dijins» cun text da Victor Hugo ei dil cumponist Gabriel Fauré. Igl buc ina leva d’exercitar, persuenter in deletg da tedlar. «Les Dijins» ei ina canzun dètg liunga cun bia ritmica e tempo. Era cul «Madrigal», medemamein da Fauré, ha il dirigent pretendiu bia da sias cantaduras e ses cantadurs. Il menader musical dall’Opera Viva Sursaissa ha l’experientscha e la segirtad d’empalar in chor tras ovras concertantas nua ch’ei drova agogica ed harmonia. Il pianist Mateusz Niedwiedski, chor e dirigent han formau ina unitad. «Mintga chor damogna buca quei», eis ei iu tras il tgau tedlond quellas franzosas. Igl auditori ha gudiu massa colurs da tuns, per gronda part tempradas e lomas.

Ella secunda part ha il chor da Trun aunc delectau cul «Magnificat» da John Rutter. Igl ei la canzun da pag ch’ils da Trun han presentau igl onn vargau alla fiasta cantunala Rezia Cantat a Chiavenna. Duront quella producziun magnifica ha ei pariu che la statua da Nossadunna sigl altar lateral, exponida pil meins da matg, semuenti levet. Omisdus chors ein sepresentai en dus blocs, mintgamai cun in cuntrast tematic. Il chor da Trun ha dedicau in bloc allas cumposiziuns las pli popularas da Carli Scherrer. Per exempel «Allas hirundellas» e «Monas en iral». Ins savess tedlar e tedlar quellas canzuns – cunzun sch’ellas vegnan cantadas aschi clar ed ulivau.

Frestg e cun resonanza

Era il chor da Vignogn ha cantau cultivau e cun grond quitau, el ha perschuadiu cun in tun sonor. Il dirigent Gieri Spescha para da disponer d’ina gruppa da cantaduras e cantadurs homogena. Il bloc sacral ha inclus tschun canzuns latinas dalla Renaschientscha. Igl «Exsultate Deo» dad Alessandro Scarlatti cuntegn fugas cugl «Alleluja». Ei ha fatg surstar cun tgei frestgadad ch’il chor ha dumignau quellas cun crescendos e resonanza. Ensemen cul Chor mischedau Vrin/Surin ei il Chor mischedau Vignogn il sulet ch’ei restaus en Lumnezia sco chor-baselgia. Ton pli legreivel eis ei ch’el ei habels da presentar in tal concert cun stil e caracter. Era el exercitescha cun in dirigent cun liunga experientscha.

El secund bloc han ils Lumnezians era schau guder ina canzun da Carli Scherrer, numnadamein «Notg d’atun». Lu han ins udiu la zun amureivla «Ad ina steila» e «La lodola» dil cumponist lumnezian Marcel Solèr. La canzun «Matg da pli baul» ha Gieri Spescha arranschau tenor igl original da Joseph Bovet. Igl ei in toc melanconic-melodius ch’il chor ha interpretau cun buna communicaziun tiel dirigent. Tier las canzuns communablas ha il concert deplorablamein piars la tensiun. Tschiens chors contan sigl entir mund «La sera spel lag» e «Reminiscenzas». Beincapiu: Igl ei bellezia melodias, duas pèrlas custeivlas da Gion Balzer Casanova e Giusep Maissen. Denton: Sco finiziun ha ei pariu ch’ellas s’accordien buca cul concept da quei concert.