Stefan Triebs (55), magister ed impiegà dal Parc Naziunal Svizzer, Zernez

Che importanza ha il rumantsch per El?

Il rumantsch es üna da las quatter linguas naziunalas svizra e’m plascha fich, eu n’ha plaschair ch’eu n’ha pudü imprender quista lingua cur ch’eu sun gnü sü da la Bassa a lavurar i’l PNS.

Co promouva El il rumantsch?

Impustüt cun discuorrer quista lingua, eu fetsch quai cur ch’eu n’ha l’occasiun, dürant mia lavur i’l PNS p. ex. culs scolars e culs indigens chi vegnan i’l parc o in nos center. Ma eir in mia vita privata a Zernez discuorra adüna rumantsch, p. ex. cun far las cumischiuns in cumün.

Che avegnir ha il rumantsch?

Eu sper ch’el haja ün lung avegnir. Per ün chi imprenda rumantsch esa üna ter sfida. I nun es be d’imprender ün dals idioms, dimpersè eir dad incleger ils differents dialects cumünals. Eu craj cha la lingua surviva, causa ch’ella es üna part da l’identità da las Rumantschas e dals Rumantschs. Sco tuot tschellas linguas as müda eir il rumantsch, quai es ün process natüral.

www.100onns.ch