Chantun e Lia reageschan cun «gea, dentant …»

Da curt è in rapport da la confederaziun vegnì a la conclusiun ch’il Grischun duaja promover pli fitg il rumantsch. En il focus da la promoziun duai star la furmaziun. Cun questa pretensiun van la Lia Rumantscha ed il chantun d’accord – dentant…

Per mantegnair e promover il rumantsch dovria quai dapli daners per la Lia Rumantscha – quai na di betg mo la Lia, mabain er il rapport. Senza la Lia fiss il rumantsch en in stan desolat. La Lia sustegnia memia blers projects pitschens enstagl da sa focussar sin paucs gronds. La cultura stuessia vegnir stritgada e quests daners vegnir investids en la furmaziun. Ed i manchia ina strategia concreta. Il chantun fetschia memia pauc per il rumantsch, pretenda il rapport. Ins possia mo promover il linguatg sch’ins haja er il daners da far quai, di Jon Domenic Parolini, cusseglier guvernativ e schef dal departament d’educaziun. In grond punct da critica èn ils meds d’instrucziun. Il departament d’educaziun evalueschia perquai il rapport ensemen cun ils partenaris che han in’incumbensa da prestaziun – numnadamain la Lia Rumantscha, la Pro Grigioni Italiano e l’anr.

La fin finala vegn il rapport er duvrà per definir quants daners che la confederaziun dat al Grischun per la promoziun da las linguas.