Midada al tgamun dil district

Dad Andreas Cadonau / ANR

Suenter 15 onns al tgamun dil District da cant Surselva ha Ewald Vinzens surdau la bitgetta a siu successur René Buchli. L’elecziun dil niev president ei succedida a caschun dalla radunonza da delegai dil district il vendergis vargau a Ruschein. Marcantas midadas ha il president partent dil District da cant Surselva Ewald Vinzens plidentau en siu davos rapport annual prelegius a caschun dalla radunonza da delegai dil district il vendergis vargau a Ruschein. Dumbrava il district igl onn 2004 aunc 53 chors ei quei diember sestabilisaus egl onn vargau sin 27 chors mischedai, otg chors virils e quater chors d’affons. Negin motiv denton da plirar davart il svilup dil cant en Surselva, Vinzens ha pudiu numnar biars puncts culminonts en siu liug temps d’uffeci. In da quels puncts culminonts, Rezia cantat, la Fiasta da cant cantunala sur cunfins a Chiavenna, ha cattau menziun speciala en il rapport presidial. Vinzens ha tschintschau dad in event singular cun ina participaziun da 13 chors davart dil District da cant Surselva. Chors ch’hagien delectau igl auditori cun excellentas prestaziuns e che seigien turnai en Surselva cun bialas e durablas impressiuns. Il Festival da la chanzun rumantscha dalla primavera vargada a Trun valetescha Vinzens sco ina nova ed impurtonta occurrenza che vegni a sestabilir el cantun Grischun. Siu davos plaid presidial al tgamun dil District da cant Surselva ha Vinzens terminau cun exprimer ils megliers giavischs viers chors, cantaduras e cantadurs, dirigentas e dirigents e d’anflar vinavon bia cuntentientscha e plascher el cant. La radunonza ha renconuschiu las stentas dil president partent cun surdar il commembradi d’honur dil District da cant Surselva. Cun applaus ha la radunonza tscharniu René Buchli da Laax sco niev president dil district. El ha surviu al district entochen ussa sco revisur da quen, conta el Chor viril da Laax ed ei gia s’engaschaus en divers uffecis en uniuns dalla vischnaunca da Laax. Buchli ha annunziau da selegrar d’astgar s’engaschar per il cant sursilvan al tgamun dil district.

Midada statutarica

En vesta alla midada al tgamun dil District da cant Surselva e la demissiun dil suprastont Silvio Erni ha la suprastonza proponiu alla radunonza da delegai ina midada dils statuts. Numnadamein da reducir il diember da suprastonts da quater sin treis. Aschia che la demissiun actuala dad in suprastont ha buca stuiu vegnir remplazzada. Delegadas e delegai han dau suatientscha alla midada ed era alla proposta da terminar igl onn da quen dil district da niev mintgamai sin la fin digl onn enstagl sin calondamars. Sco niev revisur ha la radunonza eligiu Daniel Solèr che presidiescha il Chor viril Lumnezia. Confirmau egl uffeci ha la radunonza il commember dalla cumissiun da musica Albert Spescha. Ina cumissiun tgamunada da Daniel Pally. E Pally ha presentau alla radunonza las diversas occurrenzas planisadas davart dil district egl onn da cant 19/20. In’impurtonta che festivescha il giubileum da 20 onns e ch’anfla buna accoglientscha ei la Jamna da cant per giuvenils. Egl onn da giubileum cun il motto «Aug Gliezi sunava, l’ond’Onna saltava e nus cantein dapi 20 onns». Cuntinuar vul il district medemamein cun la purschida da scolaziun per cantaduras e cantadurs lantschada igl onn vargau. Tenor Pally han las empremas duas occurrenzas anflau in bien resun cun 42 participontas e participonts a Trun e 52 a Glion, aschia ch’ei vegn a dar ina semeglionta purschida el decuors dils meins october e november. Meins cuntents ei il president dalla cumissiun da musica cun la buorsa da notas purschida dapi otg onns. La participaziun da dirigentas e dirigents ha buca contonschiu la finamira, era buca cun la preschientscha dil schefexpert da fiastas da cant, Armon Caviezel, staus a disposiziun per dar plaid e fatg davart las ponderaziuns e la sistematica da valetar las presentaziuns dils chors. Il district da cant e la cumissiun da musica pondereschan ina nova purschida.

Honorau veteranas e veterans

La radunonza da delegai dil District da cant Surselva ha honorau il vendergis vargau a Ruschein las meriteivlas cantaduras ed ils meriteivels cantadurs dil district. Per igl engaschi da 50 onns el Chor-baselgia da Breil ei Mathilda Cabernard Tenner vegnida undrada, el medem chor conta dapi 25 onns Barbara Albin. Stiafen Berther e Marcel Niedermann ein vegni undrai per lur engaschi da 25 onns el Chor viril Domat. Fridolin Albin ed Alexi Nay contan dapi 25 onns el Chor viril Lumnezia, Alice Bertogg 25 onns el Chor mischedau Sevgein e Zita Maissen medemamein in quart tschentaner el Chor cecilian Trun. Il Chor mischedau da Ruschein ha buca sulet purschiu puschegn a delegadas e delegai dil District da cant Surselva, mobein delectau ils presents cun diversas canzuns. Denter auter cun la Canzun da Ruschein, ina melodia strusch enconuschenta ordvart il cunfin dil vitg da Ruschein.