Midada da presidi el center

(anr/abc) La suprastonza dalla Surselva Romontscha ha envidau venderdis sera alla radunonza generala. Suenter sis onns ha Vitus Gartmann surdau il tgamun dall’uniun al vicepresident Alberto Palaia. Ella casa da scola a Danis ha Michael Friberg beneventau varga 40 commembers e hosps alla radunonza generala dalla Surselva Romontscha. Il parsura dil Forum cultural Breil ha presentau l’uniun e sias activitads. Ella vischnaunca da Breil s’engascha quella cun bien effect en diversas spartas. Naven dallas guidas culturalas, tgira dils usits, art, artisanadi e historia ha ella sviluppau ils davos onns ina pulita activitad. Era la tgira dil lungatg romontsch s’auda leutier. Grazia all’intervenziun dil Forum cultural Breil ha il Resort Pradas retschiert quei num local ed era las differentas casas digl uclaun turistic sper il Plaun Rueun a Breil portan nums romontschs. Rodund 200 commembers portan e sustegnan las activitads dil Forum cultural.

Suenter quella presentaziun all’entschatta ha il president Vitus Gartmann menau ina radunonza generala speditiva. Igl onn vargau ha la suprastonza giu da tractar ina roscha damondas da sustegn ed ediu sezza il «Tschespet 77» cul tetel «Verdads cun in surrir». Ei setracta da raquens da Donat Cadruvi (1923–1998) ord siu reh relasch litterar conservaus egl Archiv cultural Foppa. La Surselva Romontscha ha luvrau igl onn 2018 cun entradas da 65 541 francs ed expensas da 57 609 francs. La producziun d’ediziuns e 15 contribuziuns da sustegn per ovras ed activitads egl interess dil romontsch ein lu era las expensas principalas dall’uniun. Tier las entradas eis ei las contribuziuns annualas dils commembers da bunamein 16 000 francs e la contribuziun dalla Ligia Romontscha da biebein 23 000 francs. La radunonza generala ha concludiu da schar las contribuziuns dallas vischnauncas sco tochen dacheu silla summa da tschep da 250 francs, vitier aunc 20 raps per habitont. En tut han 16 vischnauncas pagau igl onn vargau la contribuziun, en tut eis ei la summa da 7908 francs. La contribuziun gronda ha Ilanz/Glion pagau cun 1165 francs.

Uonn ei stau in onn d’elecziuns. Il president Vitus Gartmann haveva annunziau sia demissiun, medemamein ils suprastonts Angelica Arpagaus e Jan-Andrea Bernhard. Il vicepresident Albert Palaia ei staus promts da surprender il presidi. Eligida en suprastonza dalla Surselva Romontscha ei Nadja Huonder da Rabius. La specialista da communicaziun fa part da niev dil gremi ensemen cul president Palaia, cun Flurina Cantieni-Gliott (cassiera), Rita Bearth (actuara) e Marc Elias Solèr (assessur). Dils 15 posts da delegai dalla Ligia Romontscha fuvan quater vacants. Per quels han Vitus Gartmann, Sevgein, Jan-Andrea Bernhard, Strada, Albert Spescha, Pigniu, e Retus Giger, Surrein, candidau. La radunonza generala ha eligiu els e cunquei cumpletau la delegaziun sursilvana. Il program da lavur digl onn current 2019 cuntegn duas ediziuns da cudischs. Inagada ei quei «Emilia ed ils quens». L’ovra da 50 paginas dalla giuvna lumneziana Tonja Pelican ei dapresent en stampa, text e maletgs ha ella fatg sezza. Vinavon dat ei ina restampa dil cudisch «La Strietta», la historia dad Otfried Preussler e translaziun dad Ignazi Beer. Il secretari general dalla LR, Martin Gabriel, ei staus presents alla radunonza generala ed ha informau d’actualitads e dalla fiasta centenara a Zuoz. Plinavon ha el informau ch’il biro inplus a Glion stoppi serrar per munconza d’incaricas. Per la Surselva Romontscha munta quei ch’ella sto encurir ina nova sligiaziun per siu secretariat.