Schurmetg ed ustonza

(anr/abc) Gievgia vargada, il firau d’Anceinza, ein ils reformai dalla Foppa e dil Plaun s’entupai alla fiasta ecclesiastica. Uonn ei l’occurrenza tradiziunala stada a Trin. Ina baselgia fuva oriundamein in’ustonza. Gia ils emprems cristians s’entupavan leu per survegnir confiert ed esser ensemen denter grossa miraglia. En quei senn ei la baselgia adina stada in’ustonza, in liug da schurmetg e segirtad. La fiasta ecclesiastica dallas pleivs evangelicas reformadas dalla Foppa e Plaun ei sededicada uonn a quella tematica. Cu ei ha tuccau d’ensemen gievgia vargada a Trin ein persunas dalla Foppa tochen Panaduz e Favugn idas tras la streglia da Visut viers la baselgia. Leu han la plevonessa Anja Felix-Candrian ed ils plevons Harald Schade da Flem ed Albrecht Merkel da Luven, Flond, Pitasch e Duin beneventau la raspada. En nossa regiun, en nies cantun e nossa tiara sto negin temer da prighels acuts, ei va generalmein bein cun tuts. Meinsvart sesentin nus bunamein memia segirs ed emblidein d’engraziar e d’appreziar. Antruras fuva quei tut auter, ins encureva savens confiert e schurmetg en baselgia ella cuminonza dils concartents. Ils treis plevons ch’han menau il survetsch divin festiv han accentuau quei. Il Chor mischedau Trin ha embelliu il priedi. En in discuors cuntradictoric entuorn igl altar han ils treis plevons discutau ed ein sedumandai tgei ch’ei prigulus, tgei ch’ei riscant, nua ch’ins duess haver fidonza e nua ch’ins ha raschun da dubitar. Els han era tratg a strada las leschas e segiradas che limiteschan la libertad persunala. El center dil priedi ei il psalm 91 ch’accentuescha ch’il carstgaun duei semetter sut siu schurmetg, quel seigi scut ed ustonza encunter ils paliats e tutta stgiradetgna.

La pleiv evangelica da Trin ha saviu porscher in progam accumpignont attractiv ch’ei s’accordaus cumpleinamein cul motto dalla fiasta ecclesiastica 2019. Suenter il gentar communabel ella halla plurivalenta han ins saviu visitar l’anteriura fortezia militara a Trin-Porclis sco era la casa Mesaglina, la sedia dil Project Uaul da muntogna. Omisdus loghens han connex cun prighels smanatschonts. La fortezia el Grep dad Uera ha la schuldada svizra stuiu baghegiar els onns 1941 tochen 1943. Ins vuleva esser semtgaus ell’ustonza per cass ch’igl inimitg vegness dil Rein siadora. Igl uaul ei in’autr’ustonza. Gest igl Uaul sura da Trin schurmegia il vitg encunter prighels dalla natira. Igl uaul ei denton era spazi da viver e da recreaziun. Martin Kreiliger, menader dil Project Uaul da muntogna, ha presentau cuortamein duront il gentar lavur e finamiras dall’instituziun cun sedia a Trin. L’equipa da cuschina dalla Casa Mesaglina haveva semtgau in gentar special. Aposta per rinforzar ils participonts han els purschiu ina buna pulenta cun groma tratga, survida cun rodas d’andutgel.