Culla partecipaziun 
da 400 uffants

DA FLURIN ANDRY / ANR

Daspö passa ün tschientiner organiseschan las scoulas da la part suot da l’Engiadina Bassa mincha nouv ons üna festa d’uffants. A Strada han ingon 400 scolaras e scolars passantà il di fond insembel da tuotta sorts gös. Minch’uffant dess pudair giodair dürant seis nov ons da scoula populara üna jada üna gronda festa in cumünanza culs uffants da Ftan, Tarasp, Scuol, Sent, Ramosch, Tschlin, Strada e Martina. «Causa la fusiun al cumün da Scuol d’eiran ingon da la partida eir ils uffants dad Ardez e Guarda», ha dit Gianna Rauch Poo, la mainascoula da Valsot, «in tuot han tut part a la festa var 400 uffants.» I’l center da quista festa a Strada intuorn ed in chasa da scoula es stat, sco ch’ella ha accentuà, «eir ingon il plaschair e’l star da cumpagnia e na la prestaziun». Quai han las scolaras e’ls scolars pudü far cun differents gös.

D’ingiavineras fin trar a s-chaivgia

Per occupar tuot ils 400 uffants vaiva preparà la magistraglia da Valsot ündesch gös. «No vaivan parti aint ils uffants in ündesch famiglias e quellas amo üna jada adüna in ses gruppas cun uffants gronds e pitschens», ha ella declerà, «las famiglias vaivan aint tuottas pulloverins culla medema culur.» Dürant il di hana fat ün gö davo tschel. Pels plü gronds d’eiran las lezchas pro’ls gös ün pa plü difficilas co pels pitschens, sco p. ex. pro’l quiz: Intant cha’ls giuvens tscherchaivan sün ün purtret ils sbagls faivan ils gronds sudokus. Pro oters gös collavuraivan gronds e pitschens: Pro ün gö transportaivna aua our dal batschigl dal camping da Strada tras büschens tgnüts dals uffants fin in ün pitschen recipiaint. Els han eir pudü trar cun schluppets da biatlon sün schaivgias sco pro las drettas cuorsas o cun ballas sün troclas da conservas.

Eir zambrià ed agi dal tuot i’l s-chür

Ultra dals gös chi pretendaivan indschegn corporal, p. ex. siglir cun bindels da gummi o far üna cuorsa liats tuots ün vi da tschel, haja dat eir gös particulars. In üna benna implida cun s-chalizas d’eiran zoppats blocs da lain. Ils uffants vaivan da chattar quels, tils manar cun carioulas al dret lö e fabrichar tuors. Ün’otra lezcha d’eira da zambriar ün rom da purtret. Cur cha quel rom d’eira a fin til tegnaivan ils uffants intuorn lur fatschas per gnir fotografats. Ün gö d’eira sün ün palc dal tuot aint il s-chür: Be cun palpar zavraivan ils uffants differentas ballas per tillas metter a lö illas drettas chaistas. A mezdi ha tuot la brajada as laschà gustar la marenda cha minchün vaiva tut cun sai in sia buscha. La prosma festa d’uffants es da l’on 2028.

La festa d’uffants illa part suot da l’Engiadina Bassa vain organisada fingià daspö bundant tschient ons. Ün chi’s regorda bain a las festas dals ultims decennis es Richard Marugg, magister pensiunà da Scuol: «Cur ch’eu d’eira mat d’eira la festa ün evenimaint cultural per tuot ils cumüns.» El manzuna il cortegi e’l teater sco elemaints importants da la festa da quel temp. A partir dals ons 60 s’ha quai müdà plü e plü ad ün’occurrenza sportiva ed uossa da divertimaint cumünaivel. «L’inscunter dals uffants dals differents cumüns es però restà l’intent essenzial da la festa.» Siond cha blers scolars bandunaivan la scoula populara fingià davo ot ons gniva la festa d’uffants organisada mincha ot ons. Cun quai cha las vacanzas da stà cumanzaivan plü bod fingià da prümavaira gniva realisada la festa dürant il mais avrigl», disch Marugg, «quai chi nu d’eira adüna uschè simpel causa l’ora difficila da quel mais.»