Tgazzas: Vendita material dall’armada

DA GION NUTEGN STGIER/ANR

Anc anfignen glindesde cozza la vendita da material da militer e bler oter ainten las hallas dall’Arena a Tgazzas. Da cumprar dattigl passa 500 tgossas differentas. Scu panets frestgs sa vendan las tschigulattas da militer e las pelerinas dall’armada. Anc avant 60 onns veva l’armada svizra en domber da suldos dad 800 000 dels e cun l’armada 95 è chella cefra neida redutgeida sen 400 000 omens. Avant otg onns davigl anc 200 000 suldos an Svizra ed oz èn chegl gist anc 100 000 omens. Cun liquidar l’armada adegna daple material è chel er nia an vendita. Egn tgi compra e fò gio siva digl 1992 venal chel material è Fritz Dick, en om tgi è datgesa aint igl cantun Berna. Anfignen seis gedas per onn vo el cun bler digl material or ainten las regiuns dall’antiera Svizra. Da preschaint è igl Bernes cun igls sies 20 collaboratours a Tgazzas ainten l’Arena e nia aint igl Grischun è el cun camiuns e camiuns cargeas cun roba da militer tgi l’armada dovra oz strousch anc.

Nignas armas aint igl sortimaint

An vendita vign betg angal material dall’armada svizra, mabagn er anc da diesch armadas dad otras naziuns. Crudo an îgl è tgi tranter igls visitaders sa cattan plesssas generaziuns e tgi cunzont unfants e giuvenils vevan igl pi grond gaudi da truschier ainten tot chel «plunder» da militer. Angal «crom e plunder» è igl material tgi vign vandia an nign cass, anzi, per part è igl material da buna qualitad, robust, resistent e bagn an rap. Armas e vehichels da militer existan betg aint igl vast sortimaint, persiva baionettas e cuntels, dus products tg’èn betg sottamess alla lescha d’armas. Fritz Dick dei tgi magari dumondan singuls clients schizont schi dess er da cumprar en tgar armo (Panzer).

Vers 25 000 visitaders

La fiera cun vendita a Tgazzas è per Dick la pi gronda da tottas an Svizra. Igl interess per la liquidaziun da material dall’armada è ple tgi angal grond. Cunzont la davosa fegn d’emda èn igls visitaders nias an rotscha per sgultrar e sfugnier ainten las bleras chistas e tgaschas. Chellas èn amplaneidas cun giaccas, tgotschas, stivagls, gamaschas, gamellas e tgapitschas. Zappungs, palas, blatgas da calour bregn-verd, curveias e palottas, tot chegl vign fatg venal. Dick ò menziuno tgi angal a Tgazzas atteira la «fiera» vers 25 000 visitaders, tuttegna en bel domber.

Giuvenils canoschan betg tot

Singular è bagn tgi blers giovens compran er blera roba viglia da militer. Er bleras mattas amplaneschan lour tastgas cun bler material dall’armada ed artetgels da campar tgi mantgan er betg aint igl sortimaint. Igl sortimaint è schi grond e vast tgi gist la generaziun giovna canoscha ansomma betg igl singul material tgi vign an vendita. Uscheia ò per exaimpel en mat da 16 onns musso sen ena chista amplaneida cun gamaschas e lia saveir da sies bab pertge tg’ins dovra pomai las gamaschas.

Igl pi bagn sa vendan las tschigulattas da militer, pertge strousch en visitader sorta dallas hallas sainza aveir cumpro ples tocs. Pelerinas da militer, er ellas vignan cumpradas an en cuntign. Scu tgi Dick menziunescha compran ameis dalla lotga chellas ed er blers catscheders.