Cura tgi vo per minutas e secundas
DA GION NUTEGN STGIER / ANR
La gruppa da salvamaint stradal digls pumpiers da Surses, l’equipa da spindramaint alpin svizzer, en team digl salvamaint digl spital Surses e la pulizeia èn s’unias per luvrar mang an mang. Insceno è nia en grev accident sen la veia tranter Parsonz e Salouf. La situaziun da partenza digl exercezi communabel è la suandonta: Igl è sonda dumang allas 08.00. Tranter Parsonz e Salouf, detg pi concret a Mulegn, è en auto nia giud veia e rivo giu sot la punt tgi colliescha Parsonz e Salouf. Involvo aint igl accident è er anc en oter auto, chel è pero betg cupitgia giu dalla sponda, mabagn sto farmo davant igl punt cun esser donnagea schi fitg.
Igls pumpiers dovran sustign
La gruppa da salvamaint stradala digls pumpiers vign alarmada. Cura tgi igls amprems pumpiers èn agl li ed igls manaders Felix Weber e Philippe Poltera fon en maletg digl accident vign er alarmada la gruppa da salvamaint alpin svizzer Savognin/Beiva scu sustign per salvar igls quatter blessos. Chella magna Daniel Uffer tgi è en om digl rom e scu alpinist diso cun territori pi spundeiv. A madem mument èn er gio pronts l’ambulanza digl spital Savognin ed en team dalla gruppa da salvamaint Surses cugl manader Daniel Bollier. I vo betg dei tgi er la pulizeia è preschainta e surpeglia la direcziun dall’acziun. Passa 30 persungas èn involvadas ainten l’acziun da salvamaint tg’è per tots pertutgias tuttegna bler daple tgi angal en exercezi. Igl territori è fitg teis, grev contanschibel, roma, crappa e tschitgas fon anc pi pretensious igl salvamaint. Treis persungas blessadas sa cattan aint igl auto sot igl punt ed ena persunga blessada aint igl auto tg’è betg crudo dalla sponda oragiu. Igl access tigl auto cupitgia è tot oter tgi simpel, uscheia tg’ins ò gia da procurar igl amprem per la siertad digls omens e las donnas dallas gruppas da salvamaint. Mintgign tg’è ia oragiu tigl auto è sto siero cun ena soua per saveir luvrar sainza prievel da rudlar. Gia da far ins ò er ena sort rampar per evitar tgi la crappa reiva oragiu anfignen tigl auto donnagea noua tgi niva luvro. Tar l’acziun da salvamaint ins ò er vasia tgi dovra bler, bung, cumadevel e practic material per saveir luvrar anschignevel e schi spert scu pussebel. Vasia ins ò er bagn tgi igls omens e las donnas da tottas treis organisaziuns da salvamaint canoschan igl material, son scu eir anturn cun chel e son er tge material tg’è igl pi nizevel schi vo per minutas e secundas.
Da neir tiers agls blessos è grev
Pi spert tgi igls pumpiers ed igls omens digl salvamaint alpin svizzer èn stos tigl auto donnagea on els vasia tgi da salvar igls treis blessos è tot oter tgi simpel. Per far chegl ins ò gia da romper se igl isch digl auto cun ena zanga hidraulica e speziala. Er cò è crudo an îgl tgi è nia luvro serious, cun ena calmezza e cun en bung anschign. Adegna puspe ò Curdin Nicca, igl pulicist e manader principal dall’acziun, valeto da nov la situaziun cugls schefs e manaders dallas otras organisaziuns. Per transportar igls blessos aint igl spital vess Bollier gugent laschea neir la Rega, pero perveia dalla blera brainta aint igl nord digl Grischun anfignen sessom igl Gelgia è chegl betg sto pussebel. La consequenza è alloura stada tg’ins ò mano en blesso cun l’ambulanza sen Gelgia e da lò anavant cun la Rega anfignen Lugano (chegl sa tgapescha tot tenor libret dall’acziun da salvamaint ed exercezi).
Treis fermas pitgas da salvamaint
Las treis organisaziuns da salvamaint tg’on collaboro sonda communabel èn da gronda muntada per Surses e per la regiun. Adegna puspe vignan la gruppa stradala digls pumpiers cun radond 25 omens, la gruppa da salvamaint alpin svizzer Savognin/Beiva cun 20 omens ed igl team da salvamaint Surses staziuno permanent aint igl Center da sanadad a Savognin an acziun tar accidents da tot gener.
Exercezis èn cò per sa migliurar
An general on Nicca ed igls oters schefs dallas gruppas fatg ena bilantscha positiva digl exercezi. Betg schi bung è sto tgi igls manaders dallas gruppas eran betg adegna lò tigl plaz dalla direcziun da mintga organisaziun. La communicaziun tranter igls involvos vess er savia esser miglra, è nia detg tigl rapport alla fegn. Far fotos cugl telefonign e tarmetter chellas ad ameis ed ancunaschaints ins dastga far an nign cass tar en accident real, ò punctuo Nicca. An genral seia pero nia luvro serious, cun angaschamaint e communabel scu tgi totga, ò managea igl pulicist da Savognin. Giancarlo Torriani tgi è igl manader digl departamaint da scola, salvamaint e protecziun digl pievel, da militer e digls pumpiers digl cumegn da Surses ò ludo la buna lavour da mintgign. El ò er angraztgea allas quatter organisaziuns per lour angaschamaint a favour dalla publicitad.
Gust da leger dapli?