Mantegner l’agen caracter suot ün tet cumünaivel

DA BENEDICT STECHER / ANR

La radunanza generala dal Consorzi Chasa Puntota Dmura d’attempats Engiadina Bassa (EB) ha decis da s’associar cul Center da sandà EB (CSEB). Per far quel pass es gnü approvà ün contrat da cessiun e da facultà e decis da schoglier il consorzi. Davart ün’associaziun da la dmura d’attempats EB cul CSEB esa gnü discurri fingià blers ons. Davo la decisiun dad ir la via insembel i’l futur cul CSEB han la suprastanza e la gruppa da proget elavurà dürant duos ons la documainta necessaria per cha la Chasa Puntota possa s’associar cul CSEB. Las decisiuns correspundentas per unir las duos organisaziuns es gnüda tratta cun gronda pluralità. «No vain trat decisiuns chi sun colliadas cun emoziuns, per la suprastanza, però necessarias per garantir ün bun avegnir da la Chasa Puntota. La devisa dess esser, mantgnair l’agen caracter suot ün tet cumünaivel», es la presidenta Ursina Mengiardi persvasa. Pel schogliamaint dal consorzi, per la cessiun da facultà sül CSEB sco eir pel müdamaint dals statüts haja fat dabsögn d’üna majorità da duos terzs da las vuschs valablas.

Spargnar e profitar 
da sinergias

Ouravant ha Mengiardi dat las spiegaziuns a reguard la fusiun cul CSEB: «Fingià illas prümas sezzüdas vaina badà chi dà divers puncts ingio chi’s po profitar da sinergias e chi pon avair avantags positivs per tuots. Perquai han las duos suprastanzas suottascrit ün’intenziun e dat l’incumbenza a la gruppa da proget d’evaluar ingio cha las structuras pon gnir amegldradas.» Las duos instituziuns pon tenor ella profitar da sinergias e spargnar investiziuns ed ulteriuras expensas. Eir üna part dals suprastants dal consorzi han spiegà lur tenuta per dir schi ad ün ir insembel. Il contrat es gnü preschantà dal giurist Armon Vital ed es gnü approvà cun 21:1 vuschs ed üna abstenziun. La radunanza ha autorisà cun quai a la gruppa da proget da manar las trattativas bsögnaivlas. Il contrat vain pür suottascrit cur cha tuot ils gremis van daperüna cun quel. Il contrat vala culla resalva da l’imposta da müdaman. Il müdamaint da l’artichel 45 dals statüts regla uossa nouv la liquidaziun dal consorzi. La radunanza ha dat cun gronda majorità a la cumischiun l’autorisaziun da suottascriver il contrat per executar la cessiun da la facultà e da far las annunzchas necessarias al register fundiari ed al register da commerzi. Quai chi’d es gnü valütà da maniera positiva es chi’s ha lura in futur be üna vusch vers l’extern e cun quai daplü pais.

Sainza grondas 
discussiuns

In seis rapport annual ha Mengiardi manzunà impustüt eir il proget «Chüra Futura»: «L’ingaschamaint da la suprastanza dürant il 2018 es stat grond. In sezzüdas da suprastanza, da la cumischiun da fabrica ed illa gruppa da proget Chüra Futura sun gnüdas prestadas passa 350 uras da lavur.» Ella ha eir lodà il manader da gestiun Roland Weber chi ha reorganisà l’andamaint in divers sectuors e quai adüna a favur dals abitants e dals collavuratuors. Weber d’eira gnü ingaschà per ün on, resta però inavant fin cha la fatschenda es suot tet. Il rendaquint es gnü controllà dal büro fiduziari Bezzola + Partner AG da Zernez e muossa i’l quint annual 2018 üna perdita effectiva da 317 000 francs. «Il motiv per quista perdita es in prüma lingia la realisaziun da la seguonda etappa da la renovaziun ed ingrondimaint da la Chasa Puntota cun damain entradas e sortidas imprevissas.» In quel temp nu d’eira la chasa plaina e quai ha gnü tenor ella ün’influenza sül quint.