Olivia Pfister (49), emploiada mercantila, bibliotecara e casarina, Trun

Tgei munta il romontsch per Vus?

Il romontsch ei in lungatg unic e special. El ei miu lungatg mumma ed jeu apprezieschel d’astgar haver quella prioritad. Mias soras vivan ella Svizra tudestga ni franzosa ed ellas vegnan adina puspei plidentadas pervia da lur lungatg mumma romontsch. Mes nevs e mias niazas discuoran romontsch.

Co promovis Vus il romontsch?

Jeu sesprovel aschi bein sco pusseivel da discuorer in bi romontsch. Scriver romontsch ei per mei da grond’impurtonza, era protocols e rapports. Il vocabulari sursilvan online drovel jeu stedi.

Tgei avegnir ha il romontsch?

Differentas persunas ed instituziuns en nies cantun promovan e sustegnan il lungatg romontsch. Era jasters ein interessai ed emprendan nies lungatg. Igl ei da render attenziun che nus Romontschs tegnien en honur nies lungatg e drovien el mintga di.

www.100onns.ch