Uniun da commers e mastirants Surses: 
Radunanza generala

Da Peder Antona Baltermia

Alla radunanza generala dall’Uniun da commers e mastirants Surses dall’emda passada agl Hotel Solaria a Beiva èn er stadas elecziuns per la perioda d’uffezi 2019–2021. Essend tgi dava quatter demissiuns on chels gia da neir ramplazzos. Gl’è er do ena midada da president da Conrad Plaz tar Patrick Thurner. La radunanza generala è stada chest onn ainten l’ansagna dallas midadas ainten suprastanza. Gist quatter commembers vevan inoltro lour demissiun. Tranter els er igl president Conrad Plaz tgi è siva digl 2015 sen chest post. Dasperas el vevan er sa retratg Vendelin Coray, Roberto Guetg e Gianni Spinatsch. Dalla suprastanza actuala èn Giancarlo Cavegn e Karin Hersche sa mess ad ena reelecziun.

Regiuvinaziun 
an suprastanza

La perioda d’uffezi per igls funcziunaris dall’Uniun da commers e mastirants Surses è tenor statuts fixada sen treis onns. Dallas davosas elecziuns igl onn passo ins ò decidia dad eliger angal per en onn. Igl muteiv è sto tgi ins era vedlonder da transmetter la «Famiglia Savognin» da nov ve tar «Anavant Surses». Chegl tgi è er succedia aint igl frataimp. Essend tgi la «Famiglia Savognin» n’è ossa betg ple an cumpetenza dall’uniun ins ò er savia redutgier igl domber digls suprastants da seis commembers tar tschintg. En suprastant (Vendelin Coray) era responsabel per la «Famiglia Savognin».

La radunanza dall’emda passada ò er decidia tgi ins eligia ossa la suprastanza per dus onns e tgi ins possa alloura puspe turnar tar igl turnus statutaric da treis onns.

Scu nov president è nia proponia dalla suprastanza ed eligia dalla radunanza Patrick Thurner, igl possessour e manader dalla Drogaria Surses a Savognin. Scu commember da suprastanza dad Anavant Surses ed anteriour commember dalla suprastanza da Savognin Turissem e commember da suprastanza digl anteriour cumegn da Savognin vegia el las duevlas premissas per surpiglier igl post da president.

Irene Kolb è neida eligeida scu nova commembra da suprastanza dall’Uniun da commers e mastirants Surses. Cun l’economia è ella collieida antras igl «Holzwerk Kolb GmbH» noua tgi ella è participada ed alloura scu collaboratoura parziala tar tipic.ch. A cumplettar la suprastanza vign Pirmin Cotti da Sur. El è possessour dall’interpresa innovativa «Cotti Agrar Forestal Communal». Giancarlo Cavegn e Karin Hersche èn nias reeligias. Cun las midadas è la suprastanza dall’uniun neida regiuvinada ferm.

Ins constatescha tgi la nova suprastanza represchainta bagn igl commers, la gastronomia, la mastiranza, las generaziuns, Sur- e Sotgôt e las schlattagnas (sainza leir fixar quotas).

Davantar pi activa 
ainten la politica

Conrad Plaz è sto en president activ ed avert per novas veias. Aint igl sies davos rapport annual menziunescha el igls projects economics-turistics tgi seian an construcziun. Damai betg angal segl palpieri. E chegl seia tuttegna en segn positiv. Ed el seia da buna speranza tgi er igls oters projects preschentos seian sen buna veia. En bung anviern scu igl passo dettan er impuls positivs. Tar las activitads dall’Uniun da commers e mastirants Surses ègl sto en onn «normal» cugl ansolver digls commembers, la Scuntrada, l’onorificaziun digls amprendists e las diversas antupadas alla canorta.

Pinavant ins vegia piglia posiziun tar divers sbozs da leschas tgi èn stadas an consultaziun. Tranter oter er la lescha per carrar cun vehichels sen veias da gôt. Fatschanto l’uniun vegia er la midada dalla «Famiglia Savognin» tar «Anavant Surses».

Conrad Plaz è er sa musso persvadia tgi igl angaschamaint politic dall’uniun seia basignevel e tgi el porta er fretgs. I seia pero er da basigns tgi igls commembers sa participeschan allas radunanzas communalas.

La radunanza generala ò alloura decidia da davantar commember collectiv dad «Anavant Surses» e la cntribuziun annual è neida fixada sen 2000 francs.

La proxima activitad dall’Uniun da commers e mastirants Surses è bagndalunga. Chegl è igl ansolver digls commembers tgi è mintgamai igls 6-6 allas 6.00. Chest’eda ins vo betg pi gliunsch. Ins s’antopa agl Lai Barnagn per piglier invista digl kiosk siva dalla sanaziun. Sessour dattigl igl ansolver agl Café Casparin.

Sen dumonda agl nov president, Patrick Thurner, noua tgi el vasess persunalmaintg da metter accents cun l’uniun manegia el: «Ia cat impurtant da cuntinuar sen chella veia tgi vagn instrado avant en pêr onns. Ed i saro indispensabel dad esser politicamaintg activs per saveir influenzar tgossas tgi pertotgan igl commers e la mastiranza.» Chegl manegia el an amprema lengia sen camp communal cun esser preschaint lò noua tgi dat decisiuns ed er ainten gruppas da lavour tgi elaboreschan leschas, projects etc. Impurtant pigl nov president è er da sa participar tar «Anavant Surses» per tigneir chellas colliaziuns tranter igls possessours da sagondas abitaziuns e la mastiranza.