Cavorgia maiestusa

(anr/sr) Ils premis attractivs da nos sponsurs carmalan pli e pli biars lecturas e lecturs da prender part dil legn. Era tiel legn digl avrel 2019 che purtava il tetel «La via sil pass» ei ina pluna cartas arrivada e quasi tuttas culla dretga sligiaziun, numnadamein «Val Medel (e/ni) la via sil Pass Lucmagn». La fotografia dil legn digl avrel mussava la via sil Pass Lucmagn. Aunc schischeva in tschuat neiv sils cuolms e sper via, aschia che la via cun tut sias storschas curdava en egl. La fotografia era vegnida fatga la fin mars cun ina drona. Medel ei ina vischnaunca da mesauna grondezia situada al pei dil Pass dil Lucmagn. L’avertura invernala dil pass possibilitescha ina colligiaziun permanenta encunter sid. Culla val principala e las duas vals lateralas (Val Plattas e Val Cristallina) fuorma ella in’interessanta cuntrada muntagnarda da bellezia particulara. Caracteristic per la vischnaunca da Medel ein las fracziuns situadas dretg e seniester dalla Val. Tuttas ein habitadas sur onn e fuorman ensemen cul vitg da Platta sco liug principal e Curaglia, il vitg cun ils biars habitonts, ina vischnaunca politica da ver 380 habitonts. Cun porscher ina buna infrastructura, bunas cundiziuns e buna qualitad da viver, cun far tuts sforzs per mantener plazzas da lavur sesprova la vischnaunca da frenar la depopulaziun. «Nus dein gronda peisa d’esser ina vischnaunca progressiva cun perspectivas e visiuns pigl avegnir. Buca star eri, buca schar stermentar, mirar anavon ei nossa devisa. Quei sut il motto: Sch’in siemia persuls resta ei in siemi, sche plirs siemian il medem, lu eis ei l’entschatta d’ina realitad!», pon ins leger silla pagina d’internet dalla vischnaunca da Medel.

Bellezia da sutsi e da surengiu

Avon 10 000 onns ein varga 100 000 milliuns meters cubic grep sfraccai a val. Suenter ha il Rein puspei fullau via tras quella greppa – sur onns – ed aschia scaffiu l’imposanta cavorgia ch’ei da veser silla fotografia dil legn dad oz. La foto ei vegnida fatga giu d’ina plattafuorma da survesta ch’ei beinfrequentada d’indigens e hosps. L’imposanta cavorgia ch’ei da contemplar giu spel Rein ni era giu dils aults ei da bellezia singulara e vegn era numnada Grand Canyon dalla Svizra. Viandonts ed era passagiers dalla Viafier retica gaudan da scuvierer la cavorgia ch’ei 13 kilometers liunga e fa impressiun cun sias preits crap da sablun da tochen 350 meters altezia. Da niev cursescha leu mintgamai la dumengia in tren dalla Viafier retica cun carr da survesta aviert ed ei dat era in bus che meina ils hosps ella cavorgia. Fetg emperneivel eis ei denton da far il viadi a pei per la finfinala sefermar alla riva dil Rein ed emblidar il temps.

Premis attractivs

Ei fa grond plascher da puspei astgar scriver il legn dil matg e saver regalar als victurs in pli bi ed attractiv premi che l’auter. Nus havein spluntau tier differentas pendicularas che sponsureschan gia dapi biars onns cartas dil di e grazia a quellas san nos victurs adina puspei selegrar e guder in bi di sin pista. Separticipar al legn renda forsa baul ni tard era per vus e vus astgeis ir grazia al legn da La Quotidiana in di cun skis ni forsa perfin a Flem el parc da sugas. Forsa haveis era il cletg da gudignar in bon da Tea Time by Miraval. La Lia Rumantscha sustegn nies legn cun ulteriurs premis sco discs cumpacts ni cudischs. Pia buca targlinei da scriver sin ina carta postala la sligiaziun e vossa adressa cun numera da telefon e tarmettei quella tochen il 8 da zercladur a: La Quotidiana, Susi Rothmund, Via Foppa 15, 7176 Cumpadials. Anecdotas e historias che stattan en connex culla cavorgia ch’ei da veser silla fotografia ein secapescha era giavischadas e beinvegnidas. Grazia a nos generus sponsurs savein nus porscher era quest meins attractivs premis pils victurs dil legn mensil: Duas cartas dil di regaladas dalla Skiarena Andermatt Sedrun, duas cartas dil di regaladas dil territori da skis Mustér 3000, duas cartas dil di regaladas da «Bergbahnen Obersaxen AG», ina carta dil di dil territori da skis en Val S. Pieder regalada dallas Pendicularas Vals3000, in bon ella valeta da 36 francs (entrada el parc da sugas) dil Center da sport a Flem, in bon ella valeta da 30 francs da Tea Time by Miraval a Sumvitg ed in cudisch ni in disc cumpact regalaus dalla Lia Rumantscha. Engraziel da cor als sponsurs! La soluziun vegn publicada il davos venderdis dil zercladur 2019 cul proxim legn. Bia cletg e fortuna!