Gion Lechmann (50), rectur scola cantunala, Falera

Tgei munta il romontsch per Vus?

Il romontsch ei miu lungatg mumma. Sco bab da dus affons en ina lètg linguisticamein mischedada discuorel jeu romontsch en famiglia cun nossas duas buobas. Il romontsch ei staus per mei tochen oz mo d’ avantatg – el studi, per mia professiun e per mes hobis.

Co promovis Vus il romontsch?

Cun mia lavur e collaboraziun en differents gremis ed instituziuns da lungatg e cultura hai jeu dedicau e dedicheschel vinavon ina buna part da miu temps liber pil lungatg e per la cultura romontscha. Era cun mia lavur professiunala dil mintgadi sil sectur dalla scolaziun emprovel jeu da promover el rom pusseivel ina solida purschida pil manteniment dil lungatg e la cultura romontscha.

Tgei avegnir ha il romontsch?

Il romontsch ha in dètg bien avegnir perquei che nossa generaziun giuvna – ch’ei dil reminent zun loscha da siu lungatg – ei promta da s’engaschar, discuorer e cumbatter per bunas premissas e cundiziuns optimalas ch’ei drova per segirar il futur dil romontsch.

www.100onns.ch