«Ia vess er igls recepts politics»

DA GION NUTEGN STGIER / ANR

Igl president digls hoteliers svizzers, Andreas Züllig, less daventar cunsiglier naziunal. Igl motto dalla sia campagna electorala: Chel cugl recept. Antschet chella ò igl liberal cun cuschinar plessas tratgas e preschentar igl comite d’elecziun. A chel fon part persungas digl turissem, dall’economia e dall’agricultura. Cun girar tras igl cantun croda an îgl tgi da tottas varts pendan gio placats digl hotelier Andreas Züllig, el tgi candidescha per la pld grischuna pigl cunsegl naziunal. A madem mument cun lantschar l’acziun da placats ò igl president digl hoteliers svizzers e hospitant digl hotel Schweizerhof a Lai er gist fixo la partenza digl cumbat electoral persunal. Chella ò betg gia li a Lai, mabagn a Haldenstein aint igl restaurant Calanda. Igl manader dalla campagna electorala Christof Dietler è datgesa a Haldenstein, uscheia tgi chegl è egna dallas raschungs tgi l’occurrenza ò gia li ordvart igl Grischun central.

Cuschino cun 
products regiunals

Züllig, el ò betg angal preschento sies argumaints pertge tgi electours ed electouras duessan eliger sia persunga pigl cunsegl naziunal, mabagn ò el fatg chegl cun cuschinar e sarveir en menu exquisit cun vetiers vegns digl viticultour Gian-Battista von Tscharner. Ferm sustign ò Züllig gia da Hansjörg Ladurner, egn digls sies schefs da cuschigna. Igl hotelier surmiran è en grond promotour da products regiunals, per el on turissem ed agricultura dad esser en «pêr», cun tottas dus branschas esser da grond’impurtanza per noss cantun. Aint igl Schweizerhof a Lai vign gio blers onns er cuschino cun products tgi igls cuschiniers reteiran da producents digl antier Grischun e cunzont da Surmeir.

Qualitad e singularitad

Vess el da neir eligia scu cunsiglier naziunal s’angscha el a Berna cunzont per travagls masangs, pigl turissem, per l’agricultura, per la furmaziun e pigl clima, ò detg Züllig. Igl Grischun vegia bagn disvantatgs structurals ed er per migliurar chella situaziun viglia el sa metter aint, ò menziuno igl hotelier grischun. Chegl tgi pertotga gastronomia, hotellareia, products ed aventuras porscha mintga regiun digl Grischun qualitad e cunzont er singularitad. Gist chels dus aspects seia da promover ed er far cler agl parlamaint a Berna tgi nign cantun seia schi fitg dependent da turissem ed agricultura scu igl Grischun. Züllig è digl aveis tgi igl parlamaint svizzer dovra represchentants digl turissem tgi fetschan attent all’impurtanza da chella branscha gist per cantuns muntagnards, pero er per igls martgeas.

Far en amprendissadi scu buna basa

La Svizra e cunzont er la gastronomia dovran persungas qualifitgeidas e chegl ainten mintga branscha professiunala, ò accentuo Züllig. Far en amprendissadi seia la miglra basa per la veta professiunala ed er per sa scolar venavant. I dovra betg angal academichers, mabagn er persungas tgi fetschan en amprendissadi scu fundamaint per gudagner lour pang da mintga de e schizont far carriera. Per el seia ena buna scolaziun e furmaziun igl capital per neir anavant ainten la veta professiunala, famigliara e privata, ò detg Züllig.

Per ena nateira intacta

Aint igl Grischun vegians er ena nateira intacta e da chella seia d’aveir chito, ò punctuo igl president da Hotelleriesuisse. La nateira singulara ainten tot las regiuns grischunas seia en’immensa valeta scu pac oter.

Igl hotelier e cuschinier ò er menziuno tgi la Svizra e gist igls travagls masangs duvressan pi pacas ordinaziuns, prescripziuns, regulaziuns e cunzont controllas. An chella tgossa vigna simplamaintg surfatg en po. A caschung dall’antschatta electorala ò Züllig er preschento las persungas tgi duessan esser igl «motor» per tgi el vigna eligia aint igl cunsegl naziunal igls 20 d’otgover 2019. A chel comite d’elecziun fon part donnas ed omens.