Maila cotschna

La cassiera mo guarda da quai irrità sin il maun avant ses nas e lura vinavant dal bratsch si ed en la fatscha che tutga tar quest maun. Lezza na fa nagina tschera uschia che la cassiera resignescha la finala e prenda il scanner portabel per leger en il barcode dal tatgader che tatga sin la palma dal maun. L’auter maun mo mussa ina carta da banca. La cassiera smatga trais buttuns sin il monitur, la carta charsina la gauta da l’apparat. Zahlung erfolgt. Interacziun gartegiada senza in pled. Ella banduna la fatschenta e fa rapport via telefonin. «So hai pajà. Jau crai jau vom tuttina anc a Son Galla. Quai dovra probabel l’entira saira.» Nagina resposta. Ella prenda anc ina murdida dal mail ch’ella ha gist cumprà e decida dad era scriver a ses client da Son Galla. L’um vegl ha la tendenza da la telefonar sch’ella na cumpara betg ad uras. Quai less ella evitar a tut cust. Pertge che quels apparats ston oz anc avair ina tala funcziun fa adina puspè engiavinar ella.

«Zug verpasst, komme 30 min später.» Ella spera ch’il messadi tegnia il vegl davent dal corn dal telefon – tge che n’è dal rest betg mo ina moda da dir, na, il vegl aveva effectiv anc in da quels telefons nua ch’ins pendeva il corn en ils crutschs. El pudeva pia anc pender si il telefon en il pli vair senn dal pled. Talmain retro ch’i era bunamain schon puspè cool, pensa ella durant ch’ella sa laschava auzar da la stgala mecanica ord las profunditads dal HB. Ella va sin il binari 11, sesa sin in banc e prenda ora ses laptop or dal satgados. Durant che la structura dal entretschament da fier dal banc s’imprima en sias coissas cumenza ella ina giada a metter si ina structura per la pagina da ses client. Ella emprova dad ignorar patratgs pertutgant senn e valur da sia lavur.

Cura ch’il tren arriva serra ella levgiada il visier. Ella sa svutra atras la glieud che spetga dad entrar el Interregio e sa tschenta davant da tuts avant l’isch. Davos ella spetgani gnervus e bagat da pudair entrar ed ella spetga da gugent anc in zichel pli ditg cura che la davosa persuna è sortida. Ma gist avant ch’insatgi auter po entrar avant ella fa ella svelt in passet ed entra. Ella prenda plaz en ina partiziun da quatter e cumenza a sa derasar uschè spert sco pussaivel. Ella ha gist puspè avert ses laptop e leva sa sfundrar en ses program cura ch’in maun cumpara en sia vista ed ina vusch di: «Isch da na frei?»

Scrit sin mes telefonin/cuntinuaziun suonda

Viola Pfeiffer