Cun trair laina è in um sa blessà

En la vischnanca da Sumvitg è in um sa blessà levamain la dumengia tar in accident da lavur. Sco quai che la polizia chantunala communitgescha era l’um da 43 onns vidlonder da trair in bist encugnà ord il guaud. Latiers è il bist vegni liber nunspetgadamain ed ha bittà per terra l’um. La Rega ha sgulà l’um lev blessà en l’Ospital chantunal a Cuira.

La Scola chantunala a Cuira e la Scola media alpina a Tavau han survegnì ensemen cun 16 autras scolas medias svizras il label da scola Mint 2019 fin 2024. Mint stat per ils roms matematica, informatica, scienzas natiralas e tecnica. Per l’emprima giada ha l’Academia da las scienzas natiralas svizra surdà quest label a scolas medias che s’engaschan spezialmain per scienza e tecnica. Il label, ch’ è vegnì surdà en l’institut Paul Scherrer a Villingen, duai animar ils gimnasis d’introducir la cultura da Mint ed uschia promover las spartas scienzas natiralas e tecnica.

American Airlines stritga l’aviun Boeing 737 Max pli ditg che planisà da ses urari da sgol. La societad aviatica americana na prevesia fin ils 3 da settember nagins sgols cun quest tip d’aviun, ha communitgà l’interpresa. Fin uss planisava l’interpresa da puspè laschar sgular ils aviuns a partir dals 19 d’avust. Per American Airlines ch’è ina da las pli grondas societads aviaticas en l’USA munta quai che quest tip d’aviun croda ora per las entiras vacanzas da stad. Mintga di sto l’interpresa pervi dal Boeing 737 Max stritgar radund 115 sgols.