Il luf è turnà en Rezia

(gsc) «Cratschla» (info@nationalpark.ch), revista d’infurmaziun davart il Parc Naziunal Svizzer (PNS), ha deditgà ses numer 1/2019 al return dal luf en quel intschess nua ch’el era svanì amez il 19avel tschientaner. In artitgel da lez numer, intitulà «Das Wolfsrudel am Calanda» (pp. 10–11), resguarda la part renana dal Grischun e dal chantun Son Gagl cun il Calfeisental; là viva in triep da lufs dapi 2011. «Ins na pudess betg pli metter las nursas ad alp senza protecziun en l’intschess dal triep dal Calanda» (p. 11). Enturn Zernez ed il Pass dal Fuorn è il luf preschent dapi 2017. «Cratschla 1/2019» menziuna anc «in triep en la regiun tranter il Tirol dal sid ed il Trentin a sid da Meraun» (p. 7); l’artitgel è da la perscrutadra Pia Anderwald e da Heinrich Haller, schef dal PNS fin settember 2019. Fin als 7 da mars 2020 a Zernez (www.nationalparkzentrum.ch) arranscha il PNS in’exposiziun speziala davart il luv:

– Fin als 27-10: mintga di da las 08.30–18.00.

– Dals 28-10 als 24-12: glindesdi–venderdi da las 09.00–12.00 e da las 14.00–17.00.

– Dals 26-12 als 7-3-2020: glindesdi–sonda da las 09.00–17–00.

L’exposiziun vegn cumplettada da fotografias da Klaus Robin, fundatur da «Cratschla» ed anteriur directur dal PNS. Mesemna, ils 17 da fanadur, 20.30 en la chasa dal PNS a Zernez referescha il biolog Ralph Manz davart ils lufs en Svizra.

Infurmaziuns: tel. 081 851 41 41. Dals 2-7 als 26-8 stat «Infomobil» dal PNS sper la fermada «Il Fuorn» da l’auto postal Zernez–Damal/Malles cun material d’infurmaziun.