Impurtont tierm dalla veta

(anr/hh) L’jamna vargada ein ils examens da matura al gimnasi dalla claustra da Mustér i a fin ed il venderdis sera han las maturandas ed ils maturands retschiert lur attests.

Cun quella fiasta ei in temps da scola intensiv da sis onns vegnius terminaus. La fiasta ha entschiet cun ina meditaziun ella baselgia da Nossadunna ed ei vegnida cuntinuada cun plaids e producziuns ella Sala Peter Kaiser.

Igl avat Vigeli Monn ed il rectur ad interim Tom Etter han sutlingiau las bunas prestaziuns dallas giuvnas e dils giuvens ch’han uss in bien fundament per lur studis futurs.

Alla fiasta ha il filosof, fisicher e publicist Ludwig Hasler fatg entgins interessants patratgs davart il temps da scola ed igl avegnir dallas maturandas e dils maturands.

Il davos onn da scola ed als examens finals ein per part excellentas prestaziuns vegnidas contonschidas. La megliera nota ha Salome Cavegn da Breil contonschiu (5,8), suandada da Natascha Bearth da Sumvitg (5,4), Ladina Vieli da Glion (5,37) e Lorena Cadalbert da Sevgein (5,3). Dils giuvens ha negin contonschiu ina nota sur 5,3.