Tut dependa dalla centrala

dad augustin beeli / anr

La gruppa Surselva dallas producentas dil Scarnuz Grischun sesligia culla fin da zercladur (mira LQ da gliendisgis). Actulamein fa quella novitad la curella. Allas 10 producentas sursilvanas eis ei buca reussiu d’anflar ina successura per Caroline Gerner. Ellas autras quater regiuns vesa ei ora empau meglier. Igl ei ina historia da success. Ed el zuppau eis ei in «schlagher» per la vendita turistica dil Grischun. Igl onn 1993 ha ina nova marca entschiet a sederasar per l’entira Svizra. Cun agid dalla cussegliadra purila Elisabeth Moser (mira scaffa) han 45 dunnas – cunzun puras – entschiet a producir vivonda genuina ed emplenir quella el scarnuz da pupi. Cun perseveronza e senza teorias da marketing han las sis gruppas regiunalas Surselva, Albula-Surses, Viamala, Purtenza ed Engiadina luvrau per quei product. Dapi lu han ins entschiet dapertut ad imitar il «Scarnuz grischun». Igl original exista dapi 25 onns. El cuntegn sirup, caramellas, salsiz, tuortas da nuschs, biscuits, meila e péra tosta, petta cun péra, mèl, tuargias, te, caschiel ed auter. Gest tenor giavisch sa la clientella eleger denter in scarnuz emplenius per 16 francs cun treis products tochen 125 francs cun diesch products.

Dependents dall‘economia

Pia Sigron da Lai fa part dalla suprastonza dalla cuminonza d’interess Scarnuz Grischun. Ella sa che la gruppa Surselva sesligia silla fin dil meins. «Quei ei naturalmein deplorabel. Ei era nossa gruppa la pli ferma», declara ella sin damonda dall’anr. Ina ferma petga croda naven, las autras cuntinueschan denton lur activitads. «Aunc ussa havein nus buca misergias da producir, nossas dunnas ein era motivadas», sa la pura da Lai. Da sligiar lur gruppa seigi buc en discussiun, «silmeins oz e damaun buc», gi ella. Sigron ha surpriu avon nov onns la centrala dalla gruppa Albula-Surses. Ella sezza producescha rosoli, legums per suppas e diversas tuargias e gelées. Sco menadra dalla centrala da distribuziun rimna ella tut ils products, pren si las empustaziuns e tegn il contact culla clientella. Sigron sa era che la gruppa Viamala ei actualmein era alla tscherca d’ina successura per la menadra dalla centrala. Ei vegni pli e pli stufi d’anflar dunnas che s’engaschien pil Scarnuz Grischun. Malgrad ch’igl ei ina marca renconuschida e fetg populara ell’entira Svizra gartegia ei buca da motivar dunnas e puras per ina vendita directa. «Las biaras dunnas giuvnas vulan puspei ir a luvrar ella clamada ch’ellas han empriu», gi la pura da 58 onns. Ella sezza ha gidau sil menaschi tochen ch’ils affons ein stai carschi, lu ha ella viu la schanza da far enzatgei ordeifer il menaschi puril.

Fideivels clients

Menar la centrala, il magasin, la stizun dalla gruppa regiunala dil Scarnuz Grischun ei per ella ina biala sfida. Ei seigi buc adina sempel e nunconstant. Ellas sentien era cuntinuadamein co ei mondi cull’economia. Sche quella mondi bein mondi era bein cul Scarnuz, lu vegnien las empustaziuns da sesez. Sigron para d’esser fetg iniziativa el contact culla clientella. Ell’ei loscha da collaborar cun quater gronds hotels da Lai. Dus da quels ein dètg reputai, numnadamein il Schweizerhof dalla famiglia Züllig, lu il Valbella Inn ed il Sunstar. Il menaschi dalla famiglia Sigron ei gest ella vischinonza dils cuolms da Sporz. Il hotel Guardaval ella proxima vischinonza ei in ulteriur bien client dil Scarnuz. Ils quater hotels ein ina buna basa per vender il Scarnuz. Ella confirma che la clientella hagi plascher da survegnir in tal sco regal.

Ils specialists da marketing havevan prognosticau ina cuorta veta al Scarnuz Grischun sco product da nischa. Dapi 26 onns dat ei uss el. Las quater gruppas che restan vegnan a funcziunar vinavon a moda autonoma. Ellas vendan il scarnuz da pupi empleniu culs deletgs culinarics e collavuran cull’organisaziun intercantunala Alpinavera e cun GrischunVIVA. Suenter che las Sursilvanas fuvan stadas las piunieras ein autras puras grischunas suandadas igl exempel. Ussa cala la gruppa sursilvana deplorablamein d’emplenir igl object cun status da cult. Igl ei da sperar che las autras tschun centralas cun 30 producentas suondien buca quei exempel.