Cusseglier naziunal Campell 
survegn sustegn dal cussegl federal

(cp) Cusseglier naziunal Duri Campell ha pretendì ina soluziun dal cussegl federal pertutgant il sustegn federal en l’avegnir a favur da champs da sport. Quai suenter ch’ina dretgira aveva decidì il december 2017 che las scolas dastgian pretender ina contribuziun als custs da champs obligatorics da maximalmain 16 francs per di. En in rapport publitgà dacurt retegna il cussegl federal da suandar la pretensiun da Campell e da sustegnair champs da scola cun contribuziuns pli autas. Ils 7 da december 2017 ha decidì la Dretgira federala che las scolas dastgian pretender ina contribuziun als custs da champs obligatorics da maximalmain 16 francs per di. En consequenza da quella èsi vegnì temì sin plaun naziunal che champs da sport per scolars pudessian vegnir stritgads per motivs da spargnar. Cusseglier naziunal ha Campell pretendì dal cussegl federal da demussar en in rapport tge pussaivladads ch’i dettia da pudair sustegnair pli fitg tals champs obligatorics per scolars cun meds da la confederaziun. Il cussegl federal retegna en in rapport fatg dacurt che l’organisaziun da tal champs saja positiva per giuvenils ed uffants ed als pussibiliteschia da far experientschas decisivas per lur svilup e lur socialisaziun. El considereschia perquai raschunaivel d’affruntar la sminuziun da champs per giuvenils cun pli autas contribuziuns a favur da Giuventetgna e Sport.

Da raschun èn ils chantuns responsabels per las activitads scolaras. In cas spezial furman dentant ils champs da sport obligatorics che retschaivan sustegn federal sch’els vegnan organisads en il rom da Giuventetgna e Sport. Actualmain è quai 7.60 francs per di e participant. Perquai propona il cussegl federal da stgaffir las pussaivladads giuridicas per ch’i possia vegnir augmentà il sustegn per champs da Giuventetgna e Sport a 16 francs per di e participant. Quai valess per tuttas organisaziuns, quai cumpeglia scolas che suttastattan a chantuns e vischnancas u ad associaziuns da sport e da giuvenils.