Dunnas

DA RITA CATHOMAS-BEARTH

Dapi 40 onns sun jau sin via da l’emancipaziun. Durant quel temp avain nus dunnas cuntanschì fitg bler, sche n’er betg tut. Mintgatant na fai però n’er betg donn da tschantar in pèr dumondas criticas a nus sezzas:

– Daco n’avain nus betg anc cuntanschì dapli per nus dunnas, malgrà che nus faschain la mesadad da las persunas cun il dretg da vuschar?

– Tge avain nus fatg per educar noss*as descendent*as a l’egualitad?

– Considerain nus il temp d’educaziun da noss uffants sco enritgiment per nossa vita ed experientscha professiunala?

– Èn las dunnas che stattan a chasa cun lur uffants pitschens da main valita en la societad?

– Quant fitg essan nus fitgadas en las tradiziuns?

– Frainan forsa privilegis l’emancipaziun?

– Nua na prenda la societad betg serius nus dunnas?

– Sche la societad cumenzass a pajar tut la lavur communizaivla, tge consequenzas avess quai?

– Nua fan er ils umens lavur gratuita per la societad?

– Dat mo la lavur pajada satisfacziun?

– Tge valita ha la lavur communizaivla per il spiert da cuminanza en la societad?

– Vala mo quai che porta daners insatge, er per nus?

– Tgi decida tge ch’è prestigius en nossa societad e tge betg?

– Tgi fa la politica da dunnas?

Jau sun persvasa che:

– Nus dunnas avain tutta raschun d’avair confidenza en nus.

– Nus avain blera experientscha e savida ch’ils umens n’han betg.

– Nus stuain daventar activas e betg spetgar ch’ils auters midian insatge per nus.

– Nus dunnas avain en maun da midar quai che nus vulain.

– Cumenzar stuain nus tar nus sezzas.

L’autura è redactura dals «accents».