Las puras svizras pretendan dapli dretgs

(rtr) La situaziun da las puras en la ritga Svizra na saja betg da cumparegliar cun quella da puras en l’Africa, di la presidenta da las puras svizras Anne Challandes. Ina chaussa saja dentant la medema: La segirezza sociala na sa chapeschia betg da sasez e na saja er betg garantida – ni en Svizra ni en l’Africa. Puras duain survegnir dapli dretgs politics e segirtad sociala. Questas pretaisas duain esser part da la missiva per la politica agrara 2022+. Quai pretendan las puras svizras ensemen cun Swissaid. « 70% da las dunnas sin bains purils svizzers n’han nagina paja. Quai è inacceptabel», di Challandes. I dettia 45 000 dunnas che lavurian en Svizra sin bains purils. La gronda part dad ellas, passa 31 000, n’hajan nagina paja sco er nagina segirezza sociala. Anc pli gravanta saja la situaziun en l’exteriur. E quai era sche las dunnas sajan responsablas per 70% per tut l’alimentaziun mundiala. Da sustegnair pli ferm la scolaziun da las dunnas en l’exteriur saja impurtant.