Sustegn per il 
«Green Deal» grischun

(anr/fa) Il midament dal clima fa quitads er a la maioritad dal cussegl grond grischun. Suenter ina discussiun animada ha il parlament acceptà l’incumbensa Wilhelm en il senn da la regenza. Da la stgaudada dal clima globala èn pertutgads en Svizra surtut er ils chantuns muntagnards. Perquai han Philipp Wilhelm (ps, Tavau) e 82 sutsegnaders incumbensà la regenza da suttametter al parlament in plan d’acziun numnà «Green Deal» cun mesiras per proteger il clima.

La regenza gieva d’accord cun quell’incumbensa, ha unicamain fatg la proposta d’integrar en quel anc in plan da finanziaziun e las adattaziuns necessarias da las basas legalas. En ina lunga debatta han mo la fracziun da la pps ed intgins commembers dad autras partidas proponì da refusar l’incumbensa Wilhelm. Lorenz Alig (pld, Glion) p. ex. ha argumentà che la tema davart il midament dal clima saja «gist uschè exagerada dad uschenumnads experts sco avant 40 onns la tema da la mort dal guaud».

La maioritad dal parlament era dentant d’auter avis ed ha acceptà il «Green Deal» grischun cun 103:16 vuschs.

pagina 12