«Ussa drovi fatgs»

DA SUSI ROTHMUND / ANR

La mesjamna ha l’Uniun catolica da dunnas dil Grischun salvau sia radunonza generala ad Andiast. Sper l’elecziun dalla nova presidenta Irmgard Cavigelli da Siat e las tractandas usitadas ei la cauma da dunnas ch’ha liug oz empau dapertut en Svizra stada in tema central. Ad Andiast han las commembras dall’Uniun da dunnas Andiast beneventau las varga 80 delegadas dallas uniuns digl entir cantun Grischun cun in caffè ed in stortin. L’uniun ch’ha gest festivau il 50avel onn da sia existenza ha era surviu in bien gentar allas presentas e teniu si legher quellas cun in program divertent. Avon gentar ein las dunnas aunc serendidas ella baselgia d’Andiast per assister all’impressiunonta devoziun tenida da Flurina Cavegn-Tomaschett, l’assistenta pastorala dalla vischnaunca da Breil. Sco ella ha puntuau eis ei vegniu discutau avunda d’egualitad. Ussa drovi ei fatgs, era ella baselgia catolica. Rendiu honur allas dunnas catolicas dil Grischun ha cun sia preschientscha e siu plaid era Simone Curau. Ella presidiescha dapi treis onns l’Uniun catolica da dunnas dalla Svizra ed en discuors cun l’Agentura da novitads rumantscha ha ella declarau daco ch’ella e mass’autras dunnas van oz sin via per demonstrar e tgei finamiras che las dunnas catolicas han cun lur cauma.

pagina 3