13 800 han visitau l’Ems-Chemie

Da Hans Huonder / anr

Biaras Grischunas e biars Grischuns ein carrai ina ga ni l’autra a Domat sper l’Ems-Chemie ora. La sonda vargada ei sepurschiu la caschun da mirar davos las culissas Buca meins che 1000 emploiadas ed emploiai sco era 140 collaboraturas e collaboraturs en plazzas parzialas ein engaschai sigl areal dall’interpresa a Domat ch’occupa sigl entir mund bunamein 3000 persunas. Ultra da quei vegnan 140 giuvnas e giuvens scolai en 13 differents emprendissadis. Ils cuosts da paga annuals contonschan la summa da 100 milliuns francs. Quei ei cefras impressiunontas che muossan con impurtonta che l’Ems-Chemie ei pil Grischun sco patruna. Che l’interpresa ei d’interess per la publicitad ha il di dallas portas aviartas la sonda mussau. 13 800 visitadras e visitaders han vuliu dar in sguard davos las culissas dil menaschi ch’ei engaschaus sil sectur dil material sintetic special. La scheffa dall’Ems-Chemie, Magdalena Martullo, ei lu era stada satisfatga da quei di: «Jau haiel grond plascher che tonta glieud ha visitau nus. Tuttas collaboraturas e tuts collaboraturs sco era ils biars auters gidonters han contribuiu al grond success da quei di. Jeu selegrel gia sil proxim di dallas portas aviartas.» Tgisà, forsa cuoza ei quella ga buca diesch onns entochen ch’il proxim di dallas portas aviartas ha liug. Il davos era numnadamein vegnius arranschaus igl onn 2007.

Pagina 6