Festivau il 100avel cun legendas dil sport

Da Giusep Venzin / ANR

Ina roscha anteriurs victurs da medaglias a giugs olimpics ed a campiunadis mundials han festivau la sonda ensemen cull’Uniun grischuna da skis igl anniversari rodund. La legenda dil radio Bernhard Schär ha accumpignau tras la sera da gala cun varga 300 participonts e las legendas da sport han schau reviver lur success. Schär ha clamau Dumeng Giovanoli, Heini Hemmi, Conradin Cathomen, Martin Hangl, Paul Accola e plirs auters alla tribuna tier in cuort discuors. Il reporter da sport ha brigliau cun sia savida dils detagls ed ils sportists han gudiu evidentamein igl applaus dil publicum. Giovanoli ha raquintau da ses success el slalom da Wengen e da Kitzbühel avon 50 onns e Cathomen da sia aventura il 1982 a Gröden. Leu haveva el procurau per sia emprema victoria al cup mundial e per l’emprema victoria ella cuorsa rapida ell’era da Karl Freshner. Hemmi ha raquintau da sia carriera da «Sturzenegger» alla medaglia dad aur el slalom gigant dils Giugs olimpics 1976 a Puntina (Innsbruck). «Quei success ha influenzau mia entira veta.» Quei ha era Cathomen constatau. PAccola ei staus fideivels a sia reputaziun. El senoda aunc adina bugen encunter il flum e quei ha plaschiu la sonda al publicum. El ha fatg attent Sandro Viletta – il skiunz engiadines ha gudignau als Giugs olimpics 2018 a Sotschi la medaglia d’aur ella cumbinaziun e sescolescha a trenader da skis – ch’el senodi sco trenader era encunter il flum.

Entschatta a Claustra

Ils emprems clubs da skis grischuns ein fundai igl onn 1903 a S. Murezi, Arosa, Tavau, Samedan ed a Zuoz. Dus onns pli tard ein ils skiunzs da Mustér seuni tier igl emprem club da skis en Surselva. L’iniziativa tier la fundaziun d’in’uniun grischuna ha Gustav Walty dil Club da skis Claustra giu. En ina cronica edida per il giubileum ein ils impurtonts e meins impurtonts eveniments nudai. Treis ga ei il Club da skis Tujetsch-Sedrun nudaus. Igl onn dalla fundaziun dall’uniun grischuna ha quei club retschiert dua pèra skis dil «fondo da skis gratuit». Il medem club ei denton extraus treis onns pli tard – quei per motivs finanzials. Nov onns pli tard ha il club tuatschin iniziau la fundaziun dall’Uniun sursilvana da skis.

El decuors dils 100 onns da sia existenza han Sursilvans tgamunau duront 23 onns l’uniun, ils davos Fabian Vincenz dil Club da skis Trun dil 1998 tochen il 2004 e Gabriel Casutt dil Club da skis Crap S. Gion dil 2007 tochen il 2003. Actualmein tgamuna Gaudenz Bavier da Cuera l’uniun.

Ina historia da success

Ils success dils skiunzs commembers dall’Uniun grischuna da skis ein strusch da dumbrar. L’uniun seigi era muort sias structuras en Svizra adina in bien exempel. Quei ha Marcus Wolf, il directur da Swiss Ski constatau. Da David Zogg igl onn 1931 tochen tier Mauro Caviezel igl onn 2017 dumbra l’uniun sulet ella sparta alpin 17 skiunzas e skiunzs victurs da medaglias a campiunadis mundials e diesch victurs da medaglias a giugs olimpics, da quels sis victurs dalla medaglia d’aur. Nov sportists e duas sportistas han gudignau ruclas da cristagl el Cup mundial, quei en ski alpin, cuorsa liunga, snowboard, acrobatica da skis, skicross e freeski. L’emprema rucla ha Dumeng Giovanoli gudignau il 1968 el slalom, la davosa Andri Ragettli da Flem igl unviern vargau en «big air» da freeski. Omisdus ein stai presents alla fiasta d’anniversari.