Gie alla Senda 
da tschemas

(anr/abc) La radunonza communala da Sagogn ha approbau gievgia sera il contract pertuccont il project dalla Senda da tschemas. La vischnaunca da Laax ei vidlunder da planisar quei stabiliment sin in tschancun da 2020 meters denter Murschetg e Laax Vitg. La decisiun ei curdada suenter ina discussiun animada. La finala ha ina gronda maioritad approbau il dretg da construcziun cun singulas adattaziuns dil contract. Quellas pertuccan cunzun las tschaffadas d’aua. Ils 25 da zercladur vegn la radunonza burgheisa a decider sche la vischnaunca da Laax sa realisar igl implont innovativ pil turissem. Laax vul investar 7,5 milliuns francs per la Senda da tschemas. La passarella duei menar amiez pégns e tieua, sin in’altezia denter 4 e 13 meters, atras ils uauls Casti e Ravanasc ch’ein en possess dalla vischnaunca burgheisa da Sagogn.

Plinavon ha la radunonza approbau il rapport e quen annual 2018. Il quen siara cun in gudogn da 437 660 francs, quei tier entradas da 4 514 657 ed expensas da 4 076 997 francs. Dil quen annual pigl onn da scola 2017/18 dil consorzi da scola superiura Scolaviva ha la radunonza priu notizia. Senza discussiun han ils presents approbau quel unanimamein. La vischnaunca da Sagogn ei separticipada vid ils cuosts dil consorzi culla summa da 238 805 francs. El futur vegnan quels a crescher damai ch’il diember da scolars crescha era cuntinuadamein. La vischnaunca da Laax ei sfurzada d’engrondir il spazi per la scola, uonn entscheiva ella a construir in baghetg niev sil tetg dalla halla da parcar.

Plinavon han ils 46 presents giu da prender posiziun tier ina nova damonda da sustegn per treis onns per la stizun dil Volg. Ils onns 2016 tochen 2019 ha la vischnaunca contribuiu mintgamai 30 000 francs al menaschi dall’Associaziun da consum Falera-Laax. Cun gronda maioritad ha la radunonza approbau la damonda. Buca mo il president communal Hans Peter Casutt, era ord il ravugl dils presents ei la supplica vegnida da tener culla stizun dil vitg. Quella ha fatg igl onn vargau ina sviulta da rodund 950 000 francs. Per saver luvrar senza sustegn dil cuminesser stuess la sviulta surpassar la marca dad in milliun francs.

Sco davosa vischnaunca dalla regiun ha uss era Sagogn ina nova lescha per la promoziun dil turissem e taxa da hosps. La lescha existenta ei en vigur dapi 2009. Ils davos diesch onns ha ei denton dau fetg bia midadas structuralas, quellas han sfurzau las vischnauncas vischinontas d’introducir la taxa turistica e da hosps. Quella ei daferton en vigur en tuttas vischnauncas naven da Trin tochen Tujetsch. Il cuntegn dalla lescha ei cumpletamein identics cul vertent ellas vischnauncas Flem, Laax, Falera e Schluein. Tras quella vegn Sagogn a saver curclar cuosts per prestaziuns turisticas da rodund 100 000 francs. Las tariffas dallas taxas turisticas e da hosps vegn la suprastonza communala a fixar en in uorden.