Ladina Simonelli-Zisler è la 
nova suprastanta da la SRG.R

A chaschun da la radunanza generala da la SRG SSR Svizra Rumantscha (SRG.R) è Ladina Simonelli-Zisler da Samedan vegnida elegida sco nova commembra da la suprastanza. La magistra da Samedan entra en uffizi per immediat. Ultra da quai è vegnì surdà il premi SRG.R 2019 a la scola primara da Donat per la tgira e la promoziun dal sutsilvan.

Radund 80 persunas han participà a la radunanza generala da la SRG.R a Laax. Il president Vincent Augustin, ch’è en uffizi dapi l’entschatta dal 2019, ha tranter auter er pudì beneventar il president da la SRG SSR, Jean-Michel Cina, a Laax. In punct impurtant da la radunanza è stada l’elecziun da la nova suprastanta. La suprastanza aveva proponì Ladina Simonelli-Zisler per quest post. Simonelli-Zisler ha 50 onns ed è dapi 30 onns magistra primara. Ella remplazza Gion Cola che ha demissiunà per motivs persunals. Simonelli-Zisler è vegnida elegida unanimamain.

Durant la radunanza è era vegni surdà il premi SRG.R 2019. Quel va en la Val Schons a la scola primara da Donat en renconuschientscha da sia premura per la tgira e promoziun da l’idiom sutsilvan. Sco suletta scola sutsilvana ha la scola da Donat adina puspè da cumbatter per meds d’instrucziun actuals e moderns. Per il pli translateschan las scolastas ed ils scolasts gist sezs il material d’instrucziun, e quai è adina er cumbinà cun engaschament e lavur supplementara. Radund 10 uffants da Donat èn stads preschents a la radunanza generala ed han drizzà a la SRG.R in engraziel fitg cun chanzuns da Tumasch Dolf. La SRG.R surdat mintg’onn in premi a persunas u instituziuns che s’engaschan a moda extraordinaria per linguatg e cultura rumantscha. Il premi SRG.R è dotà cun 8000 francs.