Schluein Glion anavos ella 2. ligia

Da Hans Huonder / anr

Schluein Glion ha gudignau il campiunadi da ballapei regiunal dalla 3. ligia. Igl emprem plaz munta il medem mument era la promoziun ella 2. ligia regiunala. La davosa runda dil campiunadi ei stada decisiva. Avon quella haveva Bogn Ragaz aunc in punct avantatg sin Schluein Glion. Ils Songaglies han denton spiars lur giug la dumengia ordeifer encunter Domat, ferton che l’equipa dalla Foppa ha battiu claramein Valposchiavo. «En quella davos runda ei tut iu en nossa favur. Il Diu dil ballapei ei staus da nossa vart», di il president dall’Uniun sportiva Schluein Glion, Vendelin Cabernard. Ils responsabels dall’uniun hagien fatg negin squetsch sils giugadurs: «Era quei davos giug han els dau suveran e senza nervusadad.» Per l’uniun vegn la promoziun pli baul ch’avisau. «En sesez levan nus contonscher quella en dus ni treis onns. Uss eis ella realitad e nus havein da spiarder nuot la stagiun vegnenta ella 2. ligia regiunala», puntuescha Cabernard. L’equipa hagi giu in bien svilup questa stagiun sut il trenader Alessandro Giacomelli: «Ils trenaments ein stai qualitativamein fetg buns. Cheutras havein nus era buca giu blessuras pli grondas.» Per la stagiun vegnenta giavischass Cabernard in rinforz dall’equipa cun entgins ulteriurs giugadurs dalla Surselva. La promoziun contonschida uss ei reussida cun giugadurs spirontamein dalla regiun.

Pagina 3