Sia visiun, missiun e sias valetas

(cp) La Fundaziun svizra per paraplegichers, fundada avon 44 onns, cumpeglia buca meins che diesch gruppas affiliadas. Lur visiun ei da tractar, tgirar e cussegliar paraplegichers. Finamira ei lur rehabilitaziun e reintegraziun. El center stat adina il carstgaun. La lavur quotidiana sedrezza tenor valetas da confidonza, stema e collaboraziun per ver success.

Fetg dependents dils fauturs

Senza agid finanzial dall’uniun da fauturs savess ins buca realisar l’incarica. Quella ademplescha la fundaziun cun sustegn da 1600 emploiai e tras las contribuziuns dad 1,8 milliuns fauturs. Prest mintga tierz tenercasa en Svizra ei commember dall’uniun da fauturs. Ils 1,8 milliuns commembers en 1,12 milliuns tenerscasa han spendiu igl onn vargau la summa da 70,8 milliuns francs. Il diember da fauturs per veta duronta ei carschius 2018 per 7838 sin 79 432. L’uniun da fauturs ha dau 5,6 milliuns francs per novs commembers sedisgraziai. Sco agid direct sin 1227 damondas ein 16,8 milliuns vegni impundi. Total munta quei ad ina quarta da tuttas contribuziuns da fauturs. 1205 pazients ein vegni tgirai staziunarmein en total 52 628 dis. Ils 156 letgs da pazients el Center da paraplegia a Nottwil (LU) ein stai occupai per 93%. Intragliauter vegnan las persunas tgiradas di per di duront 5,9 uras. Ella clinica speciala ein 1231 collaboraturas e collaboraturs engaschai, da quei 155 emprendists ed emprendistas. La cumpart dallas dunnas munta a 74%.

Restar sill’aulta tras 
perscrutaziun

Per esser segirs ch’il Center da paraplegia adempleschi endretg sia lavur ha il Cussegl dalla Fundaziun da paraplegia incaricau la gruppa da perscrutaziun d’elaborar in model d’agir. Quel duei survir sco basa che cumpeglia sistematicamein igl effect da tuttas prestaziuns dil center. La gruppa svizra da paraplegia ei in center da cumpetenza ed in’instituziun da referenza per tuts paraplegichers dalla Svizra sco era digl exteriur vischin.