Tarvaschegns digl vaschinadi da Donat

(anr/bt) Igl tarvaschegns digl vaschinadi da Donat digls 12 da zarcladur â prieu par bien igl quent pigls 2018, da saculiear cugl cudesch funsil da Tusàn ad igls statuts revidieus da la saranera.

Igl quent anual seara cun antradas dad 1 452 320 fràncs ad expensas dad 1 456 917. Igl preventiv prevaseva ànc egna sperdita da 122 000 fràncs. Mo igl quent mussa me ple egn pintg defizit da 4597 fràncs. Malgro que defizit â’l igl quent betga caschuno discussiùns ad e vagnieu prieu par bien unanimameing, savund las infurmaziùns digl parsura Walter Battaglia.

Igl quent d’investiziùns mussa expensas da 6132 fràncs anviers antradas da 25 205 fràncs. Quellas darivan da taxas da culiamaints.

La tractànda partutgànt reglar danov igls fatgs digl cudesch funsil â dantànt do da discussiunar. Anqualegns vessan preferieu da taner que ufezi an Schons. Mo la finala e vagnida apruvada cun grànda maioritad la proposta da saculiear cugl ufezi funsil da Tusàn.

La midada digls statuts da la saranera e vagnida prida par bien sainza discussiùn.

Plenavànt â la suprastànza infurmo partutgànt igl dacurs da la fusiùn digls vaschinadis da la Muntogna da Schons. Venavànt e’gl vagnieu infurmo sur da la numeraziùn nova digls bietgs a l’adressaziùn da tals.