Plema d’aur 2019: Success grondius en Surselva

L’jamna vargada ei vegniu surdau ella Romontschia las Plemas d’aur 2019. Il grond success ha quella concurrenza giu uonn en Surselva. Buca meins che 195 texts ha la giuria giu da valetar, tons sco en negina autra regiun. Buca meins gartegiada ei stada la sera da premiaziun, ils 13 da zercladur 2019 a Vella. Varga 200 persunas ein stadas presentas ed han fatg ord quei arranschament ina manifestaziun.

La sentupada organisada e moderada dalla promotura regiunala Alice Bertogg dil post regiunal dalla Ligia Romontscha a Glion ei stada in success cumplein. Igl ei stau ina biala fiasta cun bia fatschas cuntentas, en biala ed emperneivla atmosfera e cun buna musica frestga da Tumasch è.

Las Plemas d’aur 2019

El center dalla sera ei denton stau la premiaziun dils texts. Il tema era «Igl onn 2119 en tiara romontscha» e mintgamai treis texts da mintga categoria ein vegni rangai. Deplorablamein san ins buca numnar cheu tut ils victurs, l’annunzia cuorta dallas quater victuras sto tonscher. Ella categoria dalla tiarza e quarta classa ha Luzia Tschuor da Sagogn gudignau cun «La miracla d’in di», in text davart ina mustga tentergnaunera ch’ins sa era leger sco parabla davart ils Romontschs. La categoria dalla tschun- e sisavla classa ha Amélie Rothmund da Trun gudignau. Cun siu text «L’applicaziun dil tschentaner» ha ella fatg attents ch’ins sto agir e buca reagir per far frunt alla germanisaziun. Victorisau ella categoria dil scalem superiur ha Sarina Venzin da Curaglia cun «Igl onn 2119 en tiara romontscha», in text fin, sensibel e madir davart la veta humana en 100 onns, nua che forsa bia ei semidau, ina caussa denton buc: ils sentiments humans. Ed ella categoria da 17 tochen 25 onns ha Marina Bearth da Laax meritau la Plema d’aur cun la poesia, ni forsa meglier cul slam «Stai si e defenda», che fa ponderaziuns davart l’exclamaziun da Muoth «Stai si, defenda romontsch, tiu vegl lungatg».

Ils texts han survegniu aunc dapli forza cu las victuras han prelegiu quels, quei era per grond plascher dil grond publicum. Lez ei lu era aunc vegnius informaus che Sarina Venzin astgi – sco representanta sursilvana – preleger siu text a caschun dalla fiasta da giubileum dalla Ligia Romontscha ils 16 d’uost a Zuoz.

Gronda manifestaziun, 
absenzas deplorablas

La sera a Vella ei stada nuot auter ch’ina gronda manifestaziun, oravontut dalla giuventetgna sursilvana. Deplorar astg’ins ch’ei ha dau gronds absents a quella manifestaziun: ni RTR, ni La Quotidiana ni l’anr – quels che vegnan pagai per rapportar dil mund romontsch – han giudicau igl arranschament per relevants avunda per tarmetter in correspondent. Ei fuss stau ina pusseivladad unica da scriver davart nossa giuventetgna, tons affons sursilvans en in mun ves’ins buca savens. Plinavon han era ni representants dalla Lia Rumantscha ni dalla Surselva Romontscha fatg la breigia d’esser presents a Vella ed aschia mussar il plascher digl engaschi aschi grond dalla giuventetgna sursilvana. Speronza buca pervia da munconza da stema ni interess. Tut ils participonts alla Plema d’aur d’uonn han en mintga cass prestau grondiusa lavur e meretan grond respect ed engraziament per lur grond engaschi e per lur stentas pil romontsch. Els han mussau la gronda forza romontscha che succeda a nus pli vegls. Ei quei buca grondius?Manfred Veraguth, Sagogn