Viseta dall’Uniun da dunnas da Breil tier 
Ecco-Jäger a Bogn Ragaz

La gievgia, ils 13 da zercladur ein rodund trenta participontas serimnadas a Breil, Dardin e Danis-Tavanasa per l’excursiun cumineivla a Bogn Ragaz tier l’enconuschenta fatschenta Ecco-Jäger fretgs e verduras AG. Allas 14.30 beneventa il meinafatschenta Philipp Gschwend nus dunnas avon igl imposant baghetg dalla firma. El ha dau in’investa sur dalla fundaziun ed il svilup dalla fatschenta.

Fundaziun dalla 
fatschenta

Jeu citeschel enzacons datums sur dalla sviluppaziun da quella. Igl onn 1930 ha la famiglia Egger-Coray fundau la firma Ecco AG commerci da verduras. Enteifer ils onns ei la fatschenta sesviluppada e novs baghetgs ein vegni construi. Igl onn 2001 ei l’integraziun da verduras Selva a Laax vegnida fusiunada cun la hodierna Ecco-Jäger fretgs e verduras AG.

Igl onn 2007 ha la famiglia Gschwend da Laax surpriu la proprietad digl entir menaschi. Ils anno 2013 ei lu la surprendida dalla Frutalpina a Laax inclusiv ils conluvrers succedida. Ina sanaziun cumpleina dil baghetg e la pli gronda Aquaponik-farma da tetg dalla Svizra ei vegnida construida igl onn 2014. Avon treis onns ha Ecco-Jäger AG era surpriu la Frutalpina ad Arosa medemamein cun ils conluvrers.

Svilup dalla 
fatschenta

La sedia principala a Bogn Ragaz fatschenta ca. 50 luvreras e luvrers ed ei responsabla che las empustaziuns vegnien furnidas a dretg temps per la gronda part ella Svizra orientala.

La filiala Selva – verduras a Laax occupescha 10 emploiai e principalmein la Surselva ei il liug da furniziun. Ad Arosa ein tschun persunas engaschadas e lur rauba vegn distribuida ella regiun Arosa.

Cun ses 25 vehichels da transport climatisai furnescha la firma products frestgs a hotels, spitals, cantinas, stizuns ed ulteriuras instituziuns e quei mintga di. Il sortiment munta a ca. 2500 products che vegnan furni a 1600 clients.

El sutterran dil baghetg vein nus admirau gronds locals nua ch’ei vegn schelentau ed era sferdentau ils products che vegnan furni tenor empustaziuns alla clientella. El plaunterren ein lu verduras e fretgs magasinai. Tenor empustaziuns vegnan era quels preparai per la repartiziun als incumbensaders.

Sill’alzada su san ins admirar ina tratga da pèschs «Aquaponik». L’aua che vegn duvrada pil surviver dils p!schs vegn lu menada si ella halla sisum la casa. Quella halla ha ina surfatscha da 1000 m2 e leu vegn produciu verduras e jarvas. Per bugnar e nutrir quels products drovan ins aua senza nutriment chemic ni pesticids che vegn nezegiada ord il process da secreziun dils pèschs. Per nus dunnas ei quei proceder empau grevs da capir.

El medem baghetg sesanfla la stanza «La Culina». Leu ei vegniu surviu in aperitiv cun in gustus vin alv. Nus vein era degustau spisas che vegnan medemamein producidas leu. Quei ein capuns, raviuls, maluns e bizochels ch’han gustau oreifer. Nus havein lu era giu caschun da cumprar da quels products schelai. Al simpatic meinafatschenta Philipp in grond applaus per il grond engaschi per nus dunnas.

Cun biaras impressiuns ed orientaziun sur da quei grond ed imposant menaschi da distribuziun da verduras e fretgs pil diever da mintga di essan nus semessas sin viadi viers il Grischun.

Allas organisaturas Corina Cavegn, Alexa Schmid e Sonja Albrecht in grond engraziament pil beinreussir dall’excursiun e l’investa ad Ecco-Jäger a Bogn Ragaz.Annamaria Albrecht