60 transports
e 6 denunzias

Tar controllas da transports d’animals il glindesdi passà en Surselva, Tumleastga e Partenz ha la polizia chantunala dal Grischun controllà radund 60 transports dad anmals da niz. La gronda part da quels transports saja vegnida fatgs tenor las prescripziuns.

Tuttina haja la polizia stuì denunziar sis persunas tar la Pprocura publica grischuna – quai per esser en viadi cun transporters pauc u betg nettegiads, per betg avair cun sai ils documents necessaris u per betg avair respectà las chargias prescrittas.

Las controllas da la polizia chantunala sajan stadas part dad ina scolaziun dals spezialists interns per la protecziun d’animals, scriva la polizia. Uschia hajan ils spezialists er gist examinà e chattà per bun il transport dad ina vatga ferida.

Dapi radund nov onns lavura radund in tozzel da collavuraturs e collavuraturas da la polizia chantunala sco er da quella da la citad da Cuira sco spezialistas u spezialists per la protecziun d’animals en Grischun. Questas persunas gidian la polizia cun retschertgar ils fatgs e coordineschian las mesiras cun l’uffizi per la segirezza da victualias e per la sanadad d’animals ALT, scriva la polizia chantunala en sia communicaziun.

Las plievgiadas da l’emna passada hajan fatg gronds donns – quai surtut vi da la punt sur il Hüscherabach si sur la vischnanca da Spleia, ma er vi da la via sur il pass. Las plievgiadas dal mardi e la mesemna da l’emna passada han mess en malura differentas parts da la via dal Pass dal Spleia. La punt sur il Hüscherabach gist si sur la vischnanca da Spleia saja vegnida donnegiada fermamain. Ella na saja betg pli transibla per il traffic e stoppia vegnir reparada. Perquai saja vegnì decidì da construir ina punt provisorica. Dapi il venderdi vegnia lavurà di per di vi da questa soluziun.