En vestgiu da slondas

(anr/sr) Ils premis pil legn dil matg ein puspei zun attractivs ed han animau biaras lecturas e biars lecturs da prender part dil legn che purtava il tetel «Cavorgia maiestusa». Secapescha setracta ei cheu – sco tuts participonts han saviu – dalla Ruinaulta ni per tudestg dalla «Rheinschlucht». Ils premis arrivan proximamein culla posta. La fotografia dil legn dil matg mussava pia ina part dalla Ruinaulta, ina cavorgia maiestusa ch’ei seformada avon rodund 10 000 onns. Lu ein varga 100 000 milliuns meters cubic grep sfraccai a val tier l’immensa bova da Flem. Quella bova ha satrau il Rein sut ina massa da glera, crappa e greppa da plirs tschiens meters. Culs onns ha il Rein puspei fullau via tras la bova. Il lag da Glion ei currius giu ed aschia ei l’imposanta cavorgia ch’ei da veser silla fotografia dil legn dil matg seformada. La foto ei vegnida fatga giu dalla plattafuorma da survesta «Il Spir» ch’ei bein frequentada d’indigens e hosps. La Ruinaulta ch’ei da contemplar giu spel Rein ni era giu dils aults ei da bellezia singulara e vegn buca per nuot numnada Grand Canyon dalla Svizra. La bova da Flem ha pia scaffiu la Ruinaulta, denton era treis enconuschents lags da far bogn, numnadamein il Lag Grond amiez Laax, il Lag la Cresta ella vischinonza da Trin Mulin ed il Lag la Cauma a Flem. Viandonts, velocipedists ed era passagiers dalla Viafier retica gaudan da scuvierer la Ruinaulta ch’ei 13 kilometers liunga e fa impressiun cun sias preits crap da sablun da tochen 350 meters altezia. Mo era sill’aua – cun «kajac» ni fagend «rafting» – ei la Ruinaulta ina ver’aventura. Oz porscha quei imposant spitachel dalla natira in dacasa per differents animals – per part era a specias raras – e perfin orchideas ein d’anflar leu. Da niev cursescha mintgamai la dumengia in tren dalla Viafier retica cun carr da survesta aviert ed ei dat era in bus che meina ils hosps ella cavorgia.

Legn dil zercladur

Per far la fotografia dil legn dil zercladur essan nus stai en in vitget per fotografar la caplutta e davos quella sesarva ina biala survesta sin enzacons vitgs dalla Cadi. Perquei ch’ella ha ina fuorma speciala e sias fassadas ein cuvretgas cun slondas corrispunda ella buc exnum al maletg tradiziunal d’ina caplutta. Nus tscherchein il num dalla caplutta ch’ei vegnida contruida 1989 e dessignada d’in architect svizzer da renum. La caplutta remplazza la caplutta veglia ch’ei vegnida destruida igl unviern 1984 d’ina lavina.

Premis attractivs

Ei fa grond plascher dad era quest meins astgar regalar als victurs in pli bi ed attractiv premi che l’auter. Nus havein spluntau tier differentas pendicularas che sponsureschan gia dapi biars onns cartas dil di e grazia a quellas san nos victurs adina puspei selegrar e guder in bi di sin pista ni forsa in di da viandar duront la sesiun da stad. Separticipar al legn renda forsa baul ni tard era per vus e vus astgeis ir grazia al legn da La Quotidiana in di cun skis ni forsa perfin a Flem el parc da sugas. Cun empau cletg saveis vus era gudignar in bon da Tea Time by Miraval. La Lia Rumantscha sustegn nies legn cun ulteriurs premis sco discs cumpacts ni cudischs. Pia buca targlinei da scriver sin ina carta postala la sligiaziun e vossa adressa cun numera da telefon e tarmettei quella tochen ils 12 da fenadur a: La Quotidiana, Susi Rothmund, Via Foppa 15, 7176 Cumpadials. Anecdotas e historias che stattan en connex culla caplutta ch’ei da veser silla fotografia ein secapescha era giavischadas e beinvegnidas. Grazia a nos generus sponsurs savein nus porscher era quest meins attractivs premis pils victurs dil legn mensil: Duas cartas dil di regaladas dalla Skiarena Andermatt Sedrun, duas cartas dil di regaladas dil territori da skis Mustér 3000, duas cartas dil di regaladas da «Bergbahnen Obersaxen AG», ina carta dil di dil territori da skis en Val S. Pieder regalada dallas Pendicularas Vals3000, in bon ella valeta da 36 francs (entrada el parc da sugas) dil Center da sport a Flem, in bon ella valeta da 30 francs da Tea Time by Miraval a Sumvitg ed in cudisch ni in disc cumpact regalaus dalla Lia Rumantscha. Engraziel da cor als sponsurs! La soluziun vegn publicada il davos venderdis dil fenadur 2019 cul proxim legn. Bia cletg e fortuna!