In giurist da Turitg per Schluein

(anr/abc) La radunonza communala da Schluein ha eligiu mesjamna sera Ralf Schläpfer sco president communal. Bruno Wellinger haveva demissiunau suenter esser staus nov onns al tgamun dalla vischnaunca. Ralf Schläpfer ei giurist, ha 59 onns e posseda dapi diesch onns ina casa historica el vitg. Dapi igl atun vargau ha el era domicil stabel a Schluein. Sia elecziun sco president communal ei stada el center dalla radunonza communala. Bruno Wellinger haveva demissiunau suenter haver tgamunau nov onns la vischnaunca dalla Foppa. Ils onns 2010 tochen 2019 ein stai decisivs per Schluein. Sco quei ch’il president partent tradescha en ina intervista cull’anr havevan ses antecessurs mess fil en guila pil svilup ch’ei suandaus. Sco ei para ei la dretga glieud stada il dretg temps el dretg liug. Pertgei la vischnaunca da Schluein ha fatg enteifer diesch onns in terment segl. Igl onn 2008 registrav’ins in deivet per habitont da 2771 francs, la fin dil 2018 fuva quella cefra negativa semidada en ina positiva, numnadamein en ina facultad da 26 838 francs. Il president communal partent ha giu da realisar enteifer ils nov onns vargai duas revisiuns dalla planisaziun locala. Sco el gi ell’intervista ei quella lavur stada la basa pil svilup ch’ha entschiet.

pagina 3