Support dal Club Alpin Svizzer

Dad Andreas Cadonau / ANR

Il Club Alpin Svizzer (CAS) fa quitads pervia da las midadas climaticas. Uschia che la radunanza da delegads da la fin da l’emna è sa decidida da sustegnair l’iniziativa per ils glatschers. In confess politic extraordinari. Actualmain rimna in’uniun suttascripziuns. Ell’è s’etablida aposta per lantschar ina iniziativa per francar las finamiras climaticas da la cunvegna da Paris en la Constituziun federala. La rimnada vegn ad esser ina piculezza sch’il support davart dals 150 000 commembers dal Club Alpin Svizzer vers l’iniziativa è uschè persvadent sco davart da la radunanza da delegadas e delegads la fin da l’emna passada a Ligiaun. Sulet sis delegadas e delegads han vuschà cunter la proposta da la suprastanza da sustegnair l’iniziativa. In confess politic extraordinari, il Club Alpin Svizzer s’exprima pir la segunda giada en sia istorgia a favur dad in’intervenziun politica. Tar la basa chattan ins dentant era vuschs criticas vers l’engaschi politic dad in’organisaziun che represchenta il sport da muntogna. Il Club Alpin Svizzer e sias numerusas chamonas sentan las consequenzas da las temperaturas e la digren dals glatschers. Ed almain il timun dal Club Alpin Svizzer è pertschert dal dilemma da sa chattar tranter niz e protecziun. Tar il clima è il club sa decidì per promover la protecziun, en auters secturs dentant a favur dal niz.

pagina 2