Diversitads e specialitads

dad AUGUSTIN BEELI / ANR

Varga dus onns han las preparativas per quella fiasta cuzzau. Sonda ei stau il grond gi a Glion. La gruppa da lavur «refo500» dalla vischnaunca Ilanz/Glion ha envidau alla commemoraziun finala pil pievel dallas 13 fracziuns. La vischnaunca Ilanz/Glion exista pér dapi tschun onns e miez. Igl ei in construct politic naschius ord la fusiun. Promover il senn d’unitad e s’emprender d’enconuscher sur ils cunfins dils vitgs ein stadas finamiras dall’occurrenza da sonda vargada a Glion. La gruppa «refo500» ha vuliu contribuir cun quella alla cuminonza ella vischnaunca. Da principi haveva la fiasta entschiet il fevrer 2017 cu Glion ha retschiert la distincziun sco marcau europeic dalla Reformaziun. Glion ei, cun Cuera e Tavau, in dils treis capologhens dallas Treis Ligias, cheu han ins priu conclus historics, dapi 730 onns ei Glion in center regiunal. La separaziun dallas confessiuns ha giu suenter igl onn 1518 vastas consequenzas politicas e culturalas. Gest en quei igniv dalla Ligia Grischa ed ils vitgs vischinonts ein duas societads sesviluppadas, in mund catolic ed in reformau. Quellas diversitads han influenzau la veta ed igl uorden public.

In’empermischun pil futur

El 21avel tschentaner ei l’avischinaziun s’avanzada talmein ch’ei ha dau igl 1. da schaner 2014 ina fusiun da vischnauncas catolicas e reformadas ensemen cul marcau da Glion. Dapi lu haveva ei aunc mai dau el conglomerat Ilanz/Glion ina tala fiasta. «Igl ei l’emprema gada ch’ei dat ella nova vischnaunca ina fiasta che sefatschenta cul tema dalla fusiun, numnadamein la reuniun da 13 fracziuns», ha la presidenta communala Carmelia Maissen rendiu attent en siu plaid festiv. Tiel motto «Reuniun.s’entupar – festivar da cuminonza» commemoreschien ins perquei cun raschun quels fatgs dil vargau, ha la presidenta getg. Ella ed era il president dalla regenza, Jon-Domenic Parolini, sco era il president dalla gruppa «refo 500», Jan-Andrea Bernhard, han stuiu far lur allocuziuns da pleina dracca avon la Casa Cumin a Glion. La «benedicziun» da surengiu ei vegnida exact duront igl act festiv, il bletsch ha tuc cunzun musicantas e musicants dalla Musica Greina da Vrin ell’uniforma nova.

La fiasta rendi honur al vargau ed alla historia, ins dueigi denton veser ella era sco in’empermischun al futur. La nova identitad culla giuvna vischnaunca nova vegli denton buca scatschar las identitads existentas, mobein cumpletar lezzas. Maissen ha fatg la punt tiel program da fiasta ch’ei suandaus. Silla plazza S. Margreta han las 13 fracziuns giu caschun da sepresentar. Entginas han fatg quei da maniera creativa cun bialas inscenaziuns. Dadas specialmein en egl ein las presentaziuns da Siat, Castrisch e Luven. Era ils stans dalla gruppa d’interess marcau vegl Glion e dils da Schnaus ein dai en egl. Ils da Siat han divertiu ella baselgia s. Margreta cun ina scenetta ch’Erwin Caduff ha scret aposta per quella caschun. Vitier ha in chor ad hoc dau in pign concert, denter auter culla canzun da Siat. Ils da Luven han menau sil plaz la cuscha dalla Panera. Quella ha surviu sco meisa gigantica circumdada dils stans dallas uniuns da Luven. Ina massa glieud ei serimnada entuorn la Panera, cunzun suenter ch’ei ha calau da plover ed il sulegl ei returnaus. La presentaziun originala dils da Castrisch ei medemamein dada en egl. Els han mess a meisa festivamein e presentau in «menu» cun tuttas uniuns dil vitg. Tier il stan da Schnaus han ils carschi saviu degustar il vinars dalla destillaria e la suppa da fein dalla Stiva Veglia. Sper las presentaziuns dallas fracziuns han ins saviu visitar diversas casas historicas, ascender tiels zenns dalla baselgia s. Margreta, la Anna Catrina SA ha envidau a guidadas cun inscenaziuns e Gino Carigiet da Siat ha divertiu cun cant e musica.