Gi historic alla staziun

(anr/abc) Sonda endamaun ein representants dallas autoritads communalas, regiunalas e cantunalas s’entupai a Glion per in act historic. La direcziun dalla Viafier retica haveva envidau all’avertura dils novs binaris e sutpassadi. Ei seigi in gi historic, ha il president dil cussegl d’administraziun dalla Viafier retica, Stefan Engler, puntuau. Suenter igl onn 1903, cura ch’ins ha inaugurau e retschiert pompusamein igl emprem tren ch’ei carraus tras la Ruinaulta tochen Glion, eis ei pilver stau puspei inagada ina festivitad speciala alla staziun da Glion.

Ulteriurs pass suondan

Era la presidenta communala dad Ilanz/Glion ei stada presenta. Il directur alla VR, Renato Fasciati, ha surdau a Carmelia Maissen in tren da model sco regurdientscha. Ils davos treis onns ein 150 firmas stadas involvidas el project, 30 da quellas dalla regiun, tochen 400 persunas han luvrau sil plazzal da baghegiar. Per la summa da 29 milliuns francs ha la Viafier retica renovau cumpletamein la staziun da Glion. Duront 116 onns ein passagiers ascendi e descendi leu naven d’in binari. Quei s’auda ussa definitivamein tier la historia. Il sutpassadi ha aviert aspectativas cumpletamein novas per la viafier, pil traffic public e per Glion sco center regiunal. Sco quei che Fasciati ha declarau ei quei pass ussa fatgs, ulteriurs vegnan a succeder. «Nus savein porscher d’ussa naven a nossa clientella a Glion dapli segirtad e confort.» Ei seigi era gartegiau da zavrar il traffic da vitgira ed il traffic da persunas, lu porschi la staziun nova la pusseivladad da slargar la purschida da trens.

Agl act festiv sil binari 1 dalla «nova» staziun ei era la presidenta dil cussegl grond stada presenta. En discuors bilaterals ha Tina Gartmann-Albin schau declarar l’impurtonza che Glion ha pil traffic public. Buca mo a Glion, mobein era els auters centers regiunals dil Grischun, en 90 da totalmein 104 staziuns, sto la Viafier retica ademplir las cundiziuns dalla lescha pils basegns da persunas cun impediment. Tochen igl onn 2023 pretenda quella ch’impedi hagienn access liber als mieds publics. Culla reavertura dil sutpassadi a Glion, cun rampa enstagl scalas e cun binaris normai, ein ussa 39 staziuns baghegiadas conform als basegns dils impedi.

Sonda ha la staziun dalla Viafier retica aviert las portas da ses implonts novs. Sper il sutpassadi ed ils binaris novs ha l’equipa dil caulingia mussau sias novas localitads. La centrala da regladi ei uss en in local segir, a Pendas, dalla vart dil Rein. Sco Engler ha rendiu attent ha la Viafier retica instradau la planisaziun dil project avon 11 onns. Igl onn 2008 haveva quella entschiet, lu cul president dil marcau Martin Montalta. Ses successurs Rino Caduff ed Aurelio Casanova han cuntinuau las tractativas, quellas ein stadas cumbinadas cun vi e neu, cun garanzias dalla planisaziun locala e dalla finanziaziun. Carmelia Maissen sa ussa concluder quella fasa ed instradar las davosas duas fasas. Sco Fasciati ha fatg allusiun ei la construcziun aunc buca finida. Igl emprem realisescha la vischnaunca la via d’access pil niev terminal d’autos da posta, lu vegn la remisa veglia spazzada ed ei vegn concepiu da niev il plaz. En ina davosa fasa vegn lu la staziun veglia spazzada. In baghetg niev, adattaus als basegns e nez, vegn a remplazzar quella tochen igl onn 2023. Sin lu survegnan il sutpassadi provisori actual ed ils binaris, ovras dil biro d’inschignier Walter Bieler, tetgs definitivs.