«Musica è in linguatg 
che tuts chapeschan»

DA GION NUTEGN STGIER / ANR

Las producziuns da musica ad Arosa han confermà che la musica viva er en il Grischun. Udì han ins durant l’occurrenza cun passa 1800 musicants e musicantas interpretaziuns da vaglia. Da quel avis èn er stads ils experts e lura er il public. La 28avla Festa da musica chantunala è gia istorgia. Durant trais dis è Arosa stà en il center da la musica. Durant l’entir temp è stà d’udir musica da buna qualitad, interpretada cun plaschair e cun in bun tun. Las producziuns da las passa 50 furmaziuns da musica han confermà che la musica ha en noss chantun ina gronda muntada e ch’ella è ina ferma pitga da la cultura chantunala.

L’ierta culturala

Ina da las culminaziuns da l’occurrenza da musica da la davosa fin d’emna ad Arosa èn stads l’act da festa ed alur er il til. Il pled da festa ha tegnì cusseglier guvernativ Jon Domenic Parolini. El ha ditg che cun la musica vegnia bunamain mintgin en contact. Quai saja cun tadlar musica, cun far sez activ musica e lura er cun giudair la musica. La musica saja er ina gronda ierta culturala en noss chantun ed ella saja er ina tradiziun sur pliras generaziuns, ha menziunà il minister da cultura dal Grischun. Ditg ha Parolini er che la musica saja l’identitad culturala da nossas vischnancas, da las regiuns e dal chantun. Mintga occurrenza da musica saja er perditga che la musica vegnia tgirada, ch’ella saja cuminanza, socialesser e ch’ella vegnia charezada da bunamain mintg’uman. Grazia a la gronda passiun ed attaschadadad tar la musica saja ad Arosa betg mo stada d’udir la musica, mabain er da resentir ella, ha punctuà il cusseglier guvernativ da la pbd.

Schizunt animals aman la musica

A pled è er vegnì Martin Butzerin, il president dal comité d’organisaziun da la 28avla Festa da musica chantunala. El ha ditg che musica saja in linguatg che mintgin chapeschia. Schizunt animals aman la musica. Ella saja er inspiraziun ed attiria la simpatia da tuts. Musica munta er plaschair e quai saja stà da vesair durant l’entira occurrenza ad Arosa. Butzerin ha supplitgà musicants e musicantas da cuntinuar cun quella passiun e da tgirar er en l’avegnir la musica sco fin ussa.

Tge fiss ina vita senza ina finamira?

President da l’Uniun da musica dal Grischun è Andy Kollegger. El è er sa drizzà a la raspada. Ina festa da musica chantunala saja bler dapli che be in inscunter. Na, ella haja avant ed er suenter in effect sin musicants e musicantas. Quai cumenza cun numerusas provas, cun blers sentiments, sensibilitad, bler cor e cun inspiraziun constructiva. Kollegger ha ditg als 1800 musicants e musicantas: «Tge fiss ina vita senza ina finamira?» Gist uschia sajaa er tar il far musica. I dovra ina finamira er cun far musica, in aspect che saja da gronda valur.