Ussa far guotas cun tgau

(anr/abc) La radunonza generala da Sedrun Mustér Turissem ha eligiu gievgia sera Silvio Schmid sco successur da Corinne Staub. Cull’elecziun dil president niev e d’in suprastont ei il tgamun dall’organisaziun turistica puspei cumplets. Il vicepresident Silvio Schmid ha stuiu menar la radunonza generala. La presidenta Corinne Staub haveva numnadamein abdicau nunspitgadamein avon dus meins. La radunonza generala extraordinaria dils 19 da schaner 2018 haveva eligiu Staub sco successura da Curdin Brugger ch’haveva demissiunau. 15 meins pli tard la demissiun. Ils motivs ein buca stai tema, ed era caussas persunalas ha la radunonza generala da Sedrun Mustér Turissem ni discutau ni tractau. Ins ei staus objectivs ed ha vuliu mirar egl avegnir.

Gian e Giachen, ils stars

Ella sala Dulezi a Sedrun han ils 54 presents cun dretg da votar tedlau ina cuorta introducziun dil vicepresident Silvio Schmid. Quel ha menziunau ch’ils dus investurs Samih Sawiris e Marcus Weber hagien instradau ella regiun ina nova epoca. «Ei tucca uss a nus da tschappar quell’iniziativa gagliarda. Nus stuein concentrar las forzas e far guotas cun tgau. Andermatt Sedrun Mustér han mo aschia ina schanza», ha Schmid appellau. Leutier drovi era glieud giuvna, deplorablamein banduni quella la regiun, ei seigi glieud ch’ins druvassi urgentamein. Tals havessien oreifras schanzas el turissem ed en autras branschas. Els dueigien tuttavia ir giu la Bassa a sescolar, denton puspei turnar, ha Schmid giavischau. Quella sfida da scadina regiun perifera ei denton buca stada el center dalla 20avla radunonza generala da Sedrun Mustér Turissem. Igl emprem ha Flavio Godenzi, il responsabel da Grischun Vacanzas, presentau la lavur che l’organisaziun tetgala fa per Sedrun Mustér Turissem. Era sch’ils investurs vulan vender sezs las pernottaziuns en lur resorts segida Grischun Vacanzas en fuorma da mandat culla destinaziun. Che la regiun dalla tgina dil Rein ei appreziada e populara ha el cumprovau cun statisticas ed interrogaziuns. Per la regiun Andermatt Sedrun Mustér han ins registrau igl onn 2018 in plus da 21 pertschien, ina cefra surproporziunala ch’ha connex culla investiziun, cull’aura e cul secuntener dils Svizzers che fan puspei dapli vacanzas en lur atgna tiara. Maletgs, fotografias e filmins da reclama paran da far effect. Sco quei che Godenzi ha saviu dir han 1,5 milliuns persunas mirau il filmin dils dus capricorns Gian e Giachen al Lag la Tuma.

Nando Calore, niev suprastont

Ils presents han silsuenter priu notizia digl emprem rapport e quen annual che la giuvna meinagestiun Simona Barmettler ha presentau. Igl augment remarcabel da pernottaziuns seigi per part segir era d’attribuir alla purschida «tut inclusiv». La stad 2018, naven dil matg tochen igl october, ei la carta da hosps stada tschercada, il biro turistic ha dau ora 27 634 talas. Tier las cumpetenzas principalas da Sedrun Mustér Turissem s’audan l’informaziun e cussegliaziun sco era crear purschidas pil hosp. L’organisaziun ei responsabla pil svilup turistic e meina ils centers d’informaziun alla staziun a Mustér ed a Sedrun. Las purschidas principalas dalla stad ein las sendas da viandar e da velo, il Lag la Tuma, la ferma carta da hosps, il lag da far bogn, la claustra sco era il lavar aur. Igl unviern eis ei tuttas activitads da neiv cun pistas, loipas e turas sco era la plazza da glatsch. Sis collaboraturas lavuran per Sedrun Mustér Turissem cun plazzas da totalmein 445 pertschien. Lur prestaziuns e purschidas ein buca mo pils hosps da vacanzas, mobein era pils possessurs d’habitaziuns secundaras. Tenor ils statuts dall’uniun secumponi d’ina suprastonza paritetica da sis tochen diesch commembers, vul dir mintgamai in diember ulivau d’omisduas vischnauncas.

Per Corinne Staub sco representanta da Mustér ha la radunonza generala eligiu da niev Nando Calore. Il menader dil Catrina Resort ha igl investur Marcus Weber proponiu. El ha remarcau ch’ei dessi neginas pendicularas pli senza quei vitget da vacanzas. Suenter l’elecziun da Calore sco representant da Mustér ha la radunonza giu d’occupar il post dil president. Cun 53 da 54 vuschs han ils presents eligiu il vicepresident Silvio Schmid (Sedrun). Ils ulteriurs suprastonts da Sedrun Mustér Turissem ein Robert Cajacob (Mustér), Renato Decurtins (Sedrun), Iso Mazzetta (Mustér) e Dany Gygli (Sedrun). La finala ha la radunonza aunc giu da prender posiziun tier ina proposta formala per ina precisaziun els statuts dall’uniun. En vesta che quella duei vegnir midada igl onn proxim en ina societad acziunara ha ina pluralitad dils presents refusau quella.