Premi Wakker per Langenthal

Il Premi Wakker va quest onn a Langenthal en il chantun Berna. Il patrimoni architectonic saja creschì suenter che la citad saja stada per onns en ina crisa economica. Uschia motivescha l’uniun per la protecziun da la patria l’onuraziun. Il svilup da Langenthal saja caracterisà dal patrimoni industrial, dad ina buna planisaziun e da la prontadad a dialogar.

Ils affars online prospereschan ed uschia crescha era la fulla da pachets. La Posta Svizra sto ils proxims onns investir dapli che 200 milliuns francs per pudair dumagnar la fulla da pachets chaschunada tras ils affars online. Quai ha ella ditg a la «NZZ da la dumengia», senza dentant far indicaziuns pli exactas. L’augment planisà na pertutga dentant betg las tariffas per pachets dals consuments, mabain las tariffas per pachets da clients d’affar. Interpresas da spediziun sco Zalando ed Amazon tramettan sur onn per part milliuns da pachets. E quant bler ch’il singul consument stuess surpigliar da quest augment dal pretsch per pachet decida la finala mintga firma sezza. Per cumparegliar, la Posta britannica ha augmentà avant curt ses pretschs per pachets per var 4%.

La scola da talents da Tavau porta en l’avegnir il label da qualitad da «Swiss Olympic». Sper Tavau han anc quatter ulteriuras scolas survegnì quest label: Scola tecnica spezialisada Berna, Scola obligatoria da La Chaux-de-Fond, SBW Campus da talent a Son Gagl, SBW Campus da talent Winterthur.

Cunquai saja il dumber da las instituziuns cun in label da qualitad creschì sin 56. Quai scriva 
la federaziun tetgala dal sport svizzer.