Promover il sistem 
da milissa

(cp) L’intent da l’Associaziun da las vischnancas svizras, a basa da ses onn da la lavur da milissa 2019, tractà dacurt en in seminari a Blinzuna, è stà da discurrer surlonder e far ses patratgs. Ins ha fatg propostas per refurmar quel. En il center èn stads ils resultats dad ina lavur ch’ha perscrutà «La lavur da milissa en Svizra», vegnids resumads en ina publicaziun.

Ils auturs n’han betg be sulet analisà e descrit il status quo da la lavur da milissa en noss pajais, mabain era dà invista co quel duess esser en l’avegnir. Ins ha schizunt discurrì dad introducir en la scola il rom «furmaziun politica», sco quai ch’igl è previs en il chantun Argovia davent da 2010 per il terz stgalim superiur.

Propostas davart sistem 
da milissa

Tala scolaziun na datti strusch en Svizra tudestga. A la fin è vegnì dilucidà co quels ch’èn activs giuditgeschan l’uffizi da milissa en l’avegnir. L’Associaziun da las vischnancas svizras vegn a trair ord il workshop davart il «sistem da milissa» conclusiuns per preschentar propostas concernent sviluppar e rinforzar il sistem da milissa. Cun quels resultats vegn ins ad ir sin il parchet politic, na sulet sin plaun federal, mabain era sin il chantunal e communal.

Debattas impurtantas

Il di suenter il seminari è era la radunanza generala da l’Associaziun da vischnancas svizras s’occupada dal sistem da milissa. Tenor cuss. fed. Ignazio Cassis sajan debattas davart la valita dal sistem da milissa impurtantas. El ha gratulà a l’Associaziun da vischnancas svizras ch’ella haja declarà l’onn 2019 sco Onn da la lavur a favur dal sistem da milissa, siond che quel pertutgia blers.

Fermas vischnancas

Senza il sistem da milissa mettessian ins er en dumonda il federalissem e la subsidiaritad. L’idea dal sistem da milissa è che las decisiuns vegnian prendidas sin il pli bass plaun politic statal, pia tras la pli pitschna unitad, ch’è datiers da burgais e burgaisas. Fermas vischnancas sajan fitg impurtantas per la Svizra. Latiers basegnan ellas tant autonomia sco la libertad da pudair agir lasuenter.