Semtgada per la concurrenza internaziunala

Da Hans Huonder / anr

Grazia a bunas prestaziuns ellas davosas concurrenzas da tir cun caliber pign e buis d’aria ei Annina Tomaschett sequalificada pil Cup mundial dils juniors a Suhl en Germania. Leu survegn ella in’ulteriura caschun da semesirar sin plaun internaziunal. Ils davos onns han giuvnas e giuvens tiradurs dalla Societad da tir Voluntaria Trun adina puspei fatg furore sin plaun cantunal e naziunal. E quei ei buca semidau, il mument eis ei Annina Tomaschett (18) che tegn petg allas meglieras ed als megliers en Svizra. Ils buns resultats dalla tiradura da Trun han menau ella las davosas jamnas a concurrenzas internaziunalas nua ch’ella ha saviu semesirar sin in ault nivel cun junioras e juniors dalla medema vegliadetgna.

Trenament endinau

Dapi treis onns appartegn Tomaschett al cader dils juniors dall’Associaziun da tir svizra. Gia avon, mo surtut dapi lu vegn siu temps liber absorbaus pli u meins dil tut dils trenaments duront l’jamna ed ils tirs las fins d’jamna. Duas ga ad jamna serenda ella en accumpignament dil bab ni dalla mumma a Filzbach per exercitar el Center da sport Kerenzerberg. Leu el cantun Glaruna s’entaupan sportistas e sportists da plirs cantuns a lur trenaments. Quei viadi duas ga ad jamna fa ella praticamein duront igl entir onn. Denteren dat ei mo singulas jamnas da pausa. Baseli – il bab e trenader da casa dall’Annina – constatescha: «Nus essan rodund 45 000 kilometers sin via duront in onn ora sulettamein pil tir. En sesez ei noss’entira veta da famiglia drizzada ora sin quei. Vacanzas dat ei – cun excepziun duront la catsch’aulta – buc.» Medemamein trenescha ellas duas ga ad jamna a Trun sur la distanza da 10 meters. Quater seras ein pia reservadas, leutier sondas e dumengias per concurrenzas da tir. Tonaton vonza aunc temps per ir ellas muntognas ni si mises e guder cun collegas ni la famiglia. Sche veta da mises e tir s’uneschan, lu ei in’autra activitad buca lunsch naven. «La patenta da catscha ei segiramein ina finamira in mument. Il bab, mo era la sora ed il frar van gia a catscha», di Annina Tomaschett.

Aults records

Che las stentas dil trenament sepagan muossan ils resultats dalla giuvna tiradura ils davos onns. Ses records persunals ein remarcabels: Cul caliber pign sur la distanza da 50 meters en treis posiziuns a mintgamai 40 siets ei quel 1152 puncts, en treis posiziuns a mintgamai 20 siets 580 puncts e cun la buis d’aria (60 siets sin peis) 617,3 puncts. 6000 siets sur 50 meters e rodund 10 000 siets sur 10 meters sortan da sias buis en in onn’ora. Annina Tomaschett seregorda aunc dils emprems siets avon rodund nov onns: «Cul bab ed ils fargliuns sietan, sche vulan ins secapescha era far quei. L’entschatta vegnevan ils geniturs strusch da tener mei, il pli bugen havess jeu mo sittau.»

Sper siu grond engaschament el tir absolvescha la giuvna da Trun igl emprendissadi sco pictura tier l’interpresa Candinas a Glion. Ch’omisduas activitads van bein ina sper l’autra attribuescha il bab Baseli era al patrun: «Senza il sustegn dad Ursin Candinas fuss quei buca pusseivel. El dat la libertad ch’ei necessaria pils trenaments e tirs. Quei secapescha buca da sesez.»

Il segl egl exteriur

Ils davos meins ha Annina Tomaschett survegniu la caschun da semesirar era sin plaun internaziunal, omisduas ga en Germania. Igl emprem a Pforzheim e silsuenter a Minca. Grazia allas bunas prestaziuns eis ella sequalificada pil Cup mundial dils juniors miez fenadur a Suhl, medemamein en Germania. Otg giuvens Svizzers ein leu dalla partida u cun pistola ni buis. Igl ei in ulteriur, mo era impurtont pass ella giuvna carriera dalla tiradura: «Forsa ch’ei tonscha lu schizun da separticipar igl uost al Campiunadi da tir dall’Europa a Bologna.» Ils davos onns ei Annina Tomaschett stada fetg constanta en sias prestaziuns cun buis d’aria. El caliber pign ha ella giu uonn in fetg bien svilup ch’ha la finfinala era aviert ad ella las portas allas concurrenzas internaziunalas.

En tuttas posiziuns eis ella daventada pli segira e stabila. Sin la damonda, nua ch’ei detti aunc potenzial da semigliurar di la vegnenta pictura: «Semigliurar san ins adina en differents puncts.» Ina da sias fermezias actualas ei il tir cun caliber pign sin peis. E da tgei siemia mintga sportist? «Gie, l’olimpiada ei secapescha schon in grond siemi. Mo quella ei lunsch naven», di Annina Tomaschett. Uss astg’ins igl emprem esser spanegiaus sils resultats a Suhl.