Encuretg: Trenader d’unihoc a Mustér

Il club d’unihoc Desertina Bulls a Mustér exista gia dapi igl onn 1992. Avon vegneva ei giugau unihoc sil vegl plaz scola a Mustér. Nua ch’ei deva neginas bandas e gols adequats. Aschia ch’ei vegneva curriu pli bia suenter la balla che praticar il sport sez. Il temps entochen uss ha purtau massa midadas e gronds svilups al sport. Varga 30 000 giugaduras e giugadurs licenziai giogan il sport d’unihoc en Svizra. Dapi lu ha ei era dau in grond svilup ellas retschas dil club d’unihoc da Mustér. Actualmein dumbra il club 135 commembras e commembers che giogan en differentas equipas, las qualas tonschan naven dalla gruppa dils affons pigns Desertina Kids tier ils affons ed ils giuvenils (juniors e junioras) dalla vegliadetgna entochen 21 onns, sco era in’equipa d’umens e da damas. Il fundament dall’uniun ein ses commembers ch’ein giuvenils dalla regiun che muossan bia engaschi e pissiun per lur sport. Ils commembers organiseschan differentas occurrenzas, separticipeschan e sustegnan eveniments regiunals e representan era ella Bassa la regiun Surselva cun lur campiunadis. Sper il ballapei ei igl unihoc il sport che vegn praticaus il bia en scola sco era el temps liber.

Per mantener la grondezia e la purschida gronda drova ei adina novas persunas cun grond slontsch ed ideas novas. Aschia ei il club d’unihoc alla tscherca da novs trenaders.

L’equipa dalla secunda ligia da damas dil club d’unihoc Desertina Bulls enquera silla nova sesiun 2019/20 ina nova trenadra ni in niev trenader. L’equipa che consista ord 16 giuvnas dunnas ch’ein ambiziunadas e plein engaschi per la nova sesiun d’unihoc. Ils davos onns han ellas mintgamai saviu sedefender encunter otg equipas en lur regiun e vegnidas da seposiziunar sin in dils emprems dus plaz dalla tabella. Aschia han ellas era contonschiu la promoziun per la 1. ligia.

Per la nova sesiun enquera l’uniun in niev trenader ni ina nova trenadra ch’ei pertscharts da sia responsabladad da menar la gruppa ed ei capavels da motivar la grupp’ambiziunada cun plascher vid il sport. La nova persuna spetga in club da tradiziun cun commembers giuvens engaschai e cun in grond spért d’equipa. Sin quella persuna spetga ina gascha adequata.

Sche ti sesentas plidentaus dall’offerta, ni enconuschas enzatgi per quei post, sche lu spetga buca ditg e s’annunzia tier: adrian.flepp@desertinabulls.ch. Nus selegrein sin tei!Adrian Flepp,

president club d’unihoc Desertina Bulls