Festivà 40 onns chantun Giura

(cp) Ins sa regorda anc: Ils 24 da settember 1978 han il pievel svizzer e tut ils chantuns votà per il nov chantun Giura. Dapi l’entschatta da 1979 è quel il 23. chantun da la Confederaziun svizra. Dapi alur èn 40 onns passads. Il chantun Giura ha commemorà durant trais dis quest giubileum. L’act festal ha gì lieu dumengia passada a Saignelégier. Tut ils chantuns – cun excepziun da Berna – han prendì part cun ina delegaziun.

L’absenza dal chantun Berna ha dà bler da discurrer. Ils dus cuss. guv. bernais Pierre Alain Schnegg, che represchenta il Giura bernais en la regenza, e ses collega, Philipp Müller, han renunzià la davosa minuta da prender part da l’act festal a Saignelégier. Motiv? Tenor cuss. guv. Schnegg na possian la regenza e la polizia dal chantun Giura betg garantir la segirezza da la delegaziun bernaisa. Questa decisiun saja vegnida prendida suenter in discurs cun il guvern dal chantun Giura.

Ina raschun persuenter è stada ch’ils autonomists vegnian a mussar lur malcuntentienscha cun tumults pervia da la dumonda da Moutier. Quella vischnanca dal Giura bernais era s’exprimida 2017 per midar vi tar il chantun Giura. La stataltra guvernativa dal Giura bernais aveva alur gì declerà questa votaziun sco nunvalaivla pervi da grondas mancanzas. Il cas è da preschent pendent tar la Dretgira administrativa bernaisa. Tant il president da la regenza dal Giura sco er il cumandant da la polizia chantunala han deplorà fitg da stuair communitgar che la situaziun saja davairas difficila e heiclia.

Berset giavischa clerificaziun

Cuss. fed. Alain Berset n’ha dentant betg midà ses maini. El è vegnì tar la festa da 40 onns chantun Giura e tegnì in pled. En quel ha el ludà l’independenza dal chantun Giura sco eveniment impurtant da l’istorgia contemporana. Pertutgant la dumonda dal Giura dettia i davairas tensiuns fin ch’ins sappia tar tgi che Moutier vegnia la finala a s’udir. Il magistrat giavischa ina sperta clerificaziun.

Cuss. fed. Berset ha survegnì blers applaus, medemamain il president da la regenza dal Giura, Jacques Gerber, menziunond ch’ins n’haja anc adina betg tratg definitivamain ils cunfins. Ses giavisch è che Moutier vegnia spert tar il chantun Giura e possia prender part activamain dal svilup da quest chantun.