Lai: Auto da posta electric

DA GION NUTEGN STGIER / ANR

Siva Interlaken e Sarnen ò ossa er Lai en auto da posta electric. Sainza grond fracasch magna el chesta stad giasts ed indigens da Lai a Valbella ed anturn igl lai. Venderde passo è igl auto da posta electric nia surdo agl traffic. Pigl cumegn, pigl li e pigl ambiaint seia chegl en mument plaschevel, ò detg venderde passo Aron Moser, igl mastral da Vaz, cura tgi igl auto da posta electric è nia preschento alla publicitad. Vaz seia gio ples onns en cumegn tgi seia cunsciaint anvers igl ambiaint. «Nous dastgagn esser loschs tgi igl amprem auto da posta electric digl Grischun cursescha tenor urari anfignen igl aton da chest onn a Lai», ò detg Moser. Igls davos onns ò la regiun da vacanzas Lai gia la stad angal en bus da sport ed ossa cugl bus electric en sagond. Igl è en project da pilot ed en test sch’igl auto da posta electronic è ansomma adatto per Lai. I vign er a sa mussar schi chel fò igl sarvetsch basignevel, sch’igl è pussebel da redutgier igls costs e schurmager er igl ambiaint cun chel vehichel.

Radond 300 bus electrics

Per AutoDaPosta è Lai siva Interlaken e Sarnen igl terz li tgi survign en auto da posta electric. Chel tgi cursescha chesta stad a Lai scu bus da sport è igl anviern passo er sto per veia a Saas-Fee. Per la producziun digl auto da posta electronic segna la firma hollandesa «Ebusco». Scu tgi igl schef da chella interpresa internaziunala Jean-Luc Deflandre ò detg curseschan an Hollanda ed an Belgia radond 300 da chels bus electrics. Er a Paris seian varsaquants da chels vehichels per veia tras igl martgea. Da preschaint ins seia er vedlonder da sa fitgier pi ferm cun chel product an igls Stadis Unias dall’America.

Ena dirada da carger 
da 5–6 ouras

Igl auto da posta electric tgi la Bossi Hemmi SA ò survagnia l’emda passada è andrizzo modern, a disposiziun stattan en attatg dad «USB» ed ena reit da «wireless fidelity». I dat er en monitor noua tgi igls passagiers retschevan las infurmaziuns localas e necessarias. Ultra da chegl è la posta electrica transibla per soptga da rodas. An sasez sa disfranztgescha chel auto da posta strousch an cumparaziun cun igls autos da posta tgi cunaschagn. La differenza è simplamaintg tgi chel vo cun electric ed igls oters cun carburant. Igl vehichel ò ena lunghezza da 12 meters ed ena largezza da 2,55 meters. I dat 32 plazs per sa tschantar e 49 plazs per star an peis. Las battareias digl auto da posta electric on ena capacitad da 311kWh. La dirada da carger ellas cozza tranter 5 e 6 ouras.

Ensatge daple tgi 200 km

Eneda tgi las battareias, tgi sa cattan per gronda part segl tetg dalla posta electrica, èn cargedas è pussebel da far ensatge daple tgi 200 km. Chegl sa tgapescha schi la veia è planeiva. Per carger las battareias costa ca. 56 francs. A Lai seia igl curs digl bus da sport ple u manc planeiv, uscheia tgi seia pussebel da far tants kilometers cun chel auto da posta electric, dei Benno Bossi. Ò la veia ena pitschna pendenza, alloura sa cargia la battareia digl bus automaticamaintg. Betg adatto fiss chel auto da posta electric per exaimpel pigl tratg da Coira a Lai ed er betg da Casti a Lai. En auto da posta normal costa 350 000 francs ed igl auto da posta electric, chel costa 600 000 francs. A lunga vista vess chell’investiziun da render, cunzont cun sa redutgier igls costs da menaschi digl vehichel.